Суперлиганинг 10 тури давомида қанча мухлис стадионга келди?

Футболда ҳар қанча чиройли ўйин бўлмасин, унда мухлис бўлмаса бор жозибасини йўқотади. Бу йилги футбол бўйича Ўзбекистон суперлигаси мухлисларга жумдаям манзур бўлмоқда. Ҳар турда бири-биридан қизиқарли ўтаётган учрашувларга гувоҳ бўлишдан ташқари танаффусларда эстрадамиз ижодкорлари ижросидаги концерт дастурлари уларнинг 15 дақиқа ичида зерикиб қолмасликларини таъминламоқда. Стадионларда томошабинлар учун яратилаётган шарт-шароитларнинг яхшиланиб бориши эса мухлислар ташрифини янада кўпайтиради. Келинг, ушбу мақоламиз орқали ортда қолган 10 тур ичида стадионларга ташриф буюраётган мухлисларнинг сарҳисобини қилсак. Лавҳани бир қизиқарли факт билан бошласак. Ортда қолган сўнгги 10-турда барча турлар орасида энг кўп мухлис ташриф буюриш бўйича рекорд кўрсаткич қайд этилди. Бу гал 6 стадионга ташриф буюрган мухлислар сони 88 564 нафарни ташкил қилмоқда. Умумий барча ўйинларга келган томошабинлар сони эса 737954га етди. 

Энг кўп мухлис келган ўйин.

Бу рекорд 3-тур доирасидан ўрин олган “Навбаҳор” – “Локомотив” учрашувига тўғри келди. Наманганликларнинг мавсумдаги илк ўйинини томоша қилиш учун стадионга 25300 томошабин келган.

Энг кам мухлис келган ўйин.

Бу қўштирноқ ичидаги номинация қайсидир жамоанинг ўйинига томошабинлар кам келаётганини камситишдан эмас. Одатда энг баланд кўрсаткич ҳақида гап кетганида, ёнида минимал кўриниши ҳам тилга олиб ўтилади. Буни қарангки, бу йўналишда 5-тур доирасида амалдаги Ўзбекистон чемпиони “Локомотив” ҳамда “Қўқон-1912” жамоалари ўртасидаги баҳс қайд этилган. Ўша қарама-қаршиликни томоша қилиш учун 3123 мухлис келган.

Энг мухлис келган стадион.

Бу борада, шубҳасиз, “Бунёдкор” стадиони етакчи. “Қалдирғочлар”нинг уй учрашувларини томоша қилиш учун жами 103236 ишқибоз ташриф буюрган. Иккинчи ўринда “Бухоро” бормоқда. Улуғбек Боқоев жамоасининг ўйинлари роппа-роса 99 минг мухлис кўз ўнгида ўтди. “Пахтакор” марказий стадиони эса бу борада “кучли учликни” ёпиб турибди. “Шерлар”нинг учрашувини томоша қилиш учун жами 84552 мухлис келган. Қолган кўрсаткичлар қуйидагича.

Ўртача ташриф.

Яна бир жиҳатни эътиборга олиш керакки, регламентга кўра, жадвалда кучли 4ликдаги  жамоалар мана шу 10 турнинг 6тасини ўз майдонида ўтказишган. Бешинчи ўринда турган “Навбаҳор” эса 4 бор мезбон бўлди. “Қизилқум” майдонида 7 та баҳс ўтган бўлса, Қўқонда 3 та уч учрашуви бўлди. Шу нуқтаи назардан ўртача ташрифни ҳисоблаб чиқсак. Агар наманганликларнинг бу борадаги кўрсаткичига қарайдиган бўлсак, уларнинг яққол пешқадам эканликларига гувоҳ бўламиз. “Навбаҳор”нинг ҳар бир ўйинига ўртача 19760 мухлис тўғри келмоқда. Бу борада “Бунёдкор” иккинчи, “Бухоро” эса учинчи ўринда турибди.  

Ушбу рақамлар, айниқса, вилоятларда футбол ҳавоси пойтахтникидан кўп бўлса борки, кам эмаслигини кўрсатиб турибди. Чемпионатимизнинг олдинда кутиб турган беллашувлари ортда қолган учрашувлардан қизиқарли ўтишига, шу билан бирга мухлисларнинг ташрифи ҳам янада ортиша ҳеч қандай шубҳамиз йўқ.