Теннис қироли Энди Маррей: Истомин мени қойил қолдирди
Австралия очиқ чемпионатининг тўртинчи босқичига йўлланма олган жаҳоннинг биринчи рақамли теннисчиси Энди Маррей энг яқин таъқибчиси Новак Жоковичнинг ҳамюртимиз Денис Истоминдан мағлуб бўлганига ўз муносабатини билдирди.
- Новакнинг мусобақани тарк этгани мен учун ҳеч нимани ўзгартирмайди, - деди Энди Маррей. - Мен барибир Новакка мусобақа охирида дуч келардим. Албатта, амалдаги чемпионнинг иккинчи босқичдан чиқиши мен учун сюрприз бўлди. Унинг Австралия очиқ чемпионатида қандай ютуқларга эришганини ҳамма билади. Узоқ давом этган биринчи партиядан сўнг ҳамма Истоминнинг ўйинида пасайиш юз беришини кутганди. Мен ўйинни тўлиқ кўрмадим. Лекин Денис мени қойил қолдирди.
Денис Истомин навбатдаги учрашувини 21 январь куни ўттизинчи рақамда сараланган испаниялик Пабло Карреньо-Бустага қарши ўтказади.
Фикрлар