Тезкор хабар: "Барселона" ва Лионель Месси янги шартнома бўйича келишувга эришди
"Барселона" президенти Хосеп Мария Бартомеу ва Лионель Месси янги шартнома бўйича келишувга эришди. Улар ўртасидаги музокаралар бир неча ойдан буён давом этаётган бўлса-да, аргентиналик ҳужумчи ўз талаби бажарилмагунича клуб таклифини рад этиб келаётган эди.
Музокаранинг чўзилиб кетгани ва Лионель Месси клубда қолмоқчи эмаслигини билдирганидан кейин тўпурарга Хитой ва Европанинг бадавлат клубларидан таклифлар ёғилиб кетди.
Булардан хулоса чиқарган "Барселона" раҳбарияти Месси талаб қилаётган маошни беришга рози бўлди. Айни пайтда маош миқдори сир тутиляпти. Бироқ, маълумотларга қараганда, 29 ёшли футболчига январнинг охиригача шартнома берилади ва у имзо чекиши билан дунёнинг энг кўп маош оладиган футболчисига айланади. Шартноманинг энг муҳим шарти шуки, Месси фаолиятини якунлагунча Каталония клубида қолади.
Ҳозирги пайтда энг кўп маош олаётган футболчи Карлос Тевесдир. Яқинда Аргентинанинг "Бока Хуниорс" жамоасидан "Шанхай Шэньхуа"га ўтган футболчи ҳафтасига 615 минг фунт (720 минг евро) миқдорида маош олмоқда.
Фикрлар