Тезкор хабар! Равшан Эрматов бригадаси нега ЖЧ-2018да ўйинларни бошқармаслиги маълум бўлди

Россияда давом этаётган жаҳон чемпионатининг қолган учрашувларини бошқариши мумкин бўлган ҳакамлар рўйхати эълон қилинди.

Ушбу рўйхатдан Алиризо Фағони (Эрон), Навоф Абдулла Шукралла (Баҳрайн), Маланг Дьедиу (Сенегал), Женни Сиказве (Замбия), Марк Гейгер (АҚШ), Жейр Марруфо (АҚШ), Сесар Артуро Рамос (Мексика), Андрес Кунья (Уругвай), Нестор Питана (Аргентина), Сандро Риччи (Бразилия), Мэттью Конжер (Янги Зеландия), Жунаит Чақир (Туркия), Бьорн Кюйперс (Нидерландия), Антонио Мигель Матеу Лаос (Испания), Милорад Мажич (Сербия), Жанлука Рокки (Италия) ва Дамир Скомина (Словения) жой олган.
Юртдошларимизнинг аксарияти нима учун ўзбекистонлик Равшан Эрматов улар сафига киритилмаганини билишга қизиқишлари турган гап. “Спорт” газетасига маълум бўлишича, ФИФА лайнсмени Абдуҳамидилло Расуловнинг тиззасидан олган жароҳати безовта қилган. Шу муносабат билан ҳакамларимиз бригадаси навбатдаги учрашувларга жалб этилмайди. Лекин Равшан Эрматов ФИФА ҳакамлар гуруҳи билан Москвада машғулотларни давом эттирмоқда. Бу ҳам Халқаро футбол федерацияси мутасаддилари Эрматовга ишонишини яна бир карра тасдиқлаб турибди.

Биз Абдуҳамидилло Расулов тезда соғайиб сафга қайтишини тилаб қоламиз.

Маълумот учун, Жаҳон чемпионатлари финал босқичларида 11 учрашувда ишлаган рекордчи Равшан Эрматов Россиядаги турнирда икки ўйинда бош ҳакам сифатида ишлади. У Аргентина – Ҳорватия (0:3) ва Испания – Марокаш (2:2) баҳсларини бошқарди.