Трансферлар комбинацияси: Буффоннинг адаши ПСЖга ўтиши кутилмоқда

“Милан” посбони Жанлуижи Доннарумма ўз фаолиятини Франция чемпиони – ПСЖ сафида давом эттириши мумкин. Бу ҳақда италиялик журналист Жанлука Ди Марцио маълум қилмоқда.

Маълум қилинишича, агент Мино Райола ажойиб трансфер комбинациясини амалга оширмоқчи. Айни вақтда “Рома” посбони Алиссон Бекер  “Ливерпуль” учун тиббий кўрикдан ўтмоқда ва тез орада шартнома имзолайди. Дарвозабонсиз қолган римлкилар ПСЖдан Альфонс Ареоляни харид қилса, Доннарумма ПСЖ аъзосига айланади.

“Милан”даги молиявий муаммолар туфайли клуб раҳбарияти Жанлуижи Доннаруммани сотишга қарши бўлмаслиги айтилмоқда.

Қайд этиш жоиз, Доннарумма ПСЖга ўтадиган бўлса, адаши Жанлуижи Буффон билан бирга ҳаракат қилади. Буффон ёзда эркин агент сифатида “Ювентус”дан ПСЖга ўтганди.