Умид Аҳмаджонов спорт мактабларида ота-оналардан йиғиладиган пул масаласи катта муаммо эканини айтди

 

28 март куни Миллий олимпия қўмитасида Ўзбекистон Республикаси Президентининг спортга оид фармон ва қарори ижросини жадаллаштириш, самарали ва сифатли ишлаши учун амалга оширилаётган ишларни назорат қилиш борасида йиғилиш бўлиб ўтди.

Унда Ўзбекистон Миллий олимпия қўмитаси Президенти Умид Аҳмаджонов, Ўзбекистон Жисмоний тарбия ва спорт вазири Шоакрам Исроилов, вазирнинг биринчи ўринбосари Ойбек Касимов, МОҚ Бош котиби Жасур Матчанов, шунингдек, МОҚ ва вазирлик тизимидаги мутасадди ходимлар иштирок этишди. Йиғилишда фармон юзасидан бошлаб юборилган ишлар, унинг самарали ижросини таъминлаш йўлида кўплаб масалалар муҳокама қилинди. 

Бугунги кунда спортнинг кўпгина турларида Ўзбекистон терма жамоалари учун хориждан кучли мутахассисларни жалб қилиш борасида иш бошлаб юборилган. Жумладан, Умид Аҳмаджонов топшириғига биноан спортнинг эшкак эшиш, енгил атлетика, велоспорт, бадиий гимнастика, дзюдо, каратэ, оғир атлетика, қиличбозлик, сузиш, ўқ отиш, таэквондо ҳамда теннис турларида кучли мутахассислар номзоди кўриб чиқилмоқда.

Хабарингиз бор, бу йил спортчиларимиз Жакартадаги Осиё ўйинларида, шунингдек, Буэнос-Айрес шаҳрида бўлиб ўтадиган III ўсмирлар Олимпия ўйинларида иштирок этадилар. Мазкур катта спорт мусобақаларига муносиб тайёргарлик кўриш мақсадида МОҚ ва вазирлик ходимлари иштирокида иккита махсус комиссия ташкил қилинди. Комиссия мазкур спорт мусобақаларида иштирок этадиган спортчиларимизни мусобақага тайёрлайди. Аниқроқ, айтадиган бўлсак, уларни ўйинлардаги иштирокини ташкилий томонлама таъминлаб беради, ўқув-машғулот йиғинлари ва спортчиларнинг кун тартибини назорат қилади.

МОҚ раҳбари Олимпия захиралари коллежлари ҳамда болалар ва ўсмирлар спорт мактабларини инвентарлар билан таъминлаш жараёни тўғри, эҳтиёждан келиб чиққан ҳолда тақсимланиши лозимлигини қайд этди. Шунингдек, шарқ яккакурашлари бўйича федерация ва ассоциациялар, тўгараклар фаолиятини таҳлил қилиш, иштирок этаётган мусобақалари, молиявий ҳолатларни назорат қилиш шартлиги таъкидлаб ўтилди. 

Бундан буён Олимпия захиралари коллежларида ўқувчиларни овқат билан таъминлаш, ҳар бир спорт турига алоҳида рацион белгилаш масаласида бошқача тизимда иш кўриб чиқилиши йиғилишда маълум қилинди. Бунгача бу борада олиб борилган тизим ўзини оқламагани ҳам йиғилиш иштирокчилари томонидан қайд этилди.

Шунингдек, Умид Аҳмаджонов болалар ва ўсмирлар спорт мактабларида ёш спортчиларнинг ота-оналаридан пул йиғиб олиш ҳолатлари ҳақида ҳам гапирди.

"Давлат болалар ва ўсмирлар спорт мактабларида фаолият олиб бораётган мураббийларнинг маоши учун миллиардлаб пул ажратади. Улар эса маошдан ташқари ёш спортчиларнинг ота-оналаридан ҳам пул оладилар. Ушбу ҳолат ўз навбатида норозиликларга сабаб бўлмоқда. Бу борада аниқ тизим ишлаб чиқишимиз керак. Бу бизнинг энг оғриқли нуқталаримиздан биридир", - деди МОҚ Президенти.

Йиғилиш давомида болалар ва ўсмирлар спорт мактаблари тизимини ҳам қайта кўриб чиқиш шарт эканлиги айтилди. 

"БЎСМлардаги иш тизимини йўлга қўйиб олишимиз шарт. Масалан, бир футбол интернати бор. У ерда футбол майдонининг ҳолатини назорат қилиш учун жавобгар ходим йўқ. Аммо, у ерда маош оладиган 50 нафарга яқин мураббий бор. Биз сонга эмас, сифатга эътибор қаратишимиз лозим. Спорт мактаблари ўртасида ўзаро мусобақаларни кўпайтиришимиз лозим. Улар ўртасида рақобатни кучайтирайлик. Ана шунда ривожланиш бўлади. Пойдеворни мустаҳкам қўйиб олмасак, 2024 йилги Олимпия ўйинларида ҳам ишонч билан иштирок эта олмаслигимиз мумкин.

Биз татбиқ этишни истаётган тизимга асосан умумтаълим мактаблари ИБЎСМ ва БЎСМларга, улар эса ўз навбатида Олимпия захира коллежларига иқтидорли спортчиларни тайёрлаб беришлари керак", - деди Умид Аҳмаджонов.

Давлатимиз раҳбарининг спортга оид фармонида Тошкент шаҳрида спорт кийими, анжомлари ва жиҳозларини ишлаб чиқарувчи замонавий корхоналар фаолиятини ташкил этиш учун “Спорт” эркин иқтисодий зонасини ташкил қилиш банди ҳам бор. Ушбу бандга асосан бугунги кунда йирик хорижий компаниялар ва инвесторларни жалб қилиш, шунингдек, маҳаллий тадбиркорлар билан ҳамкорлик қилиш борасида иш бошлаб юборилгани қайд этиб ўтилди.

Фикрлар

Фикр қолдириш учун авторизациядан ўтинг!