Владимир Кличко профессионал фаолиятини якунлаганлигини эълон қилди

Супер оғир вазнда собиқ жаҳон чемпиони Владимир Кличко ўзининг профессионал  фаолиятини якунлаганини эълон қилди.

“Мен ўйлаган барча нарсамга эришдим ва мен энди ўзимнинг спортдан кейинги иккинчи карерамни бошламоқчиман. Мен ўзимнинг боксдаги фаолиятим бу қадар узоқ давом этишини ва бу қадар омадли кечиши ҳақида ўйлаб ҳам кўрмаган эдим”, - дейди Кличко.

Маълумот учун, 41 ёшли украиналик боксчи профессионал фаолияти давомида жами 69та жанг ўтказган ва шуларнинг 64тасида (53таси нокаут) ғалаба қозонган. Қолган 5та жангда эса мағлубиятга учраган.

У шунингдек 1996 йилги ёзги Олимпиада ўйинлари ғолиби, WBO (2000-2003, 2008-2015), IBF (2006-2015), WBA (2011-2015) йўналишларида жаҳон чемпиони ҳисобланади.

Эслатиб ўтамиз, Кличко сўнгги бор жорий йилнинг 29 апрель куни Лондондаги “Уэмбли” стадионида Энтони Жошуага қарши рингга кўтарилган ва жангнинг 11-раундида техник нокаутга учраган эди. Шартномага кўра эса шу йилнинг 11 ноябрь куни Лас-Вегасда реванш жангги бўлиб ўтиши керак эди. Бироқ, энди ушбу баҳс ўтказилмайдиган бўлди.