WSB. Шахрам Ғиёсов Риода таслим этган рақибини қайта синовдан ўтказади

Ўзбек боксчиларидан ташкил топган “Uzbek Tigers” жамоаси Жаҳон Бокс Серияларида (World Series of Boxing) ўз юришларини давом эттиради. Бу сафар улар ушбу мусобақанинг чорак финал жавоб учрашувида Куба пойтахти Гавана шаҳрида “Cuba Domadores” боксчиларига қарши жанг қилишади.

Ҳамюртларимиз Жасурбек Латипов ҳамда Элнур Абдураимовнинг чиқишларидан сўнг, рингга 69 кг вазн тоифасида Шахрам Ғиёсов чиқиб келади. Ўз вазн тоифасида Осиёнинг тенгсиз боксчиси ҳисобланган Шахрам ушбу жангда кубалик Роньель Иглесиасга қарши баҳс олиб боради.

2016 йилги XXXI ёзги Олимпия ўйинларининг чорак финал учрашувида айнан Шахрам Ғиёсовга таслим бўлган “Cuba Domadores” вакили бугунги қарама-қаршиликда «реванш» олиш учун ҳаракат қилиб кўради. 29 ёшни қарши олаётган ушбу боксчи 2005 йилдан бери ҳаваскор боксда бир қатор совринларни қўлга киритиб келмоқда. Бироқ 2008 йилги Пекинда ўтказилган Олимпиадада бронза медалини ҳамда Лондондаги ёзги Олимпиадада олтин медални қўлга киритган Роньель Иглесиас сўнгги йилларда медаллардан қуруқ қолмоқда. Мисол учун, 2015 йили Доҳа мезбонлик қилган Жаҳон чемпионатини чорак финалдаёқ якунлади.

Жаҳон Бокс Серияларининг бу йилги мавсумида уч бор рингга кўтарилган Куба вакили бир бор рақибини иккинчи раунддаёқ таслим этган бўлса, икки бор очколар ҳисобига ғалабани қўлга киритган. Қайд этиш жоизки, ушбу мусобақанинг ўтган йилги мавсумида Игласиас “Cuba Domadores ” таркибида “Uzbek Tigers” жамоаси вакили Махмуд Гаиповни яққол устунлик билан мағлуб этган эди.

Ҳамюртимиз Шаҳрам Ғиёсов эса ўтган йилги Риода ўтказилган ёзги Олимпия ўйинларида кумуш медаль билан тақдирланганидан сўнг бироз спорт формасини йўқотди чоғи бу йилги мавсумни кутилмаган мағлубият билан бошлади. Жаҳон Бокс Серияларининг C гуруҳида Қозоғизистоннинг "Astana Arlans" жамоаси вакили Асланбек Шимбергеновга қарши рингга кўтарилган боксчимиз очколар ҳисобида имкониятни бой бериб қўйди. Бироқ Шахрам ўзининг кейинги жангида хитойлик боксчилардан ташкил этилган “China Dragons” жамоаси аъзоси Вей Лиуга ҳеч қандай имконият қолдирмаган ҳолда ғалаба қозонди.

Шу билан бир қаторда, май ойининг биринчи ҳафтасида мамлакатимиз мезбонлик қилган Бокс бўйича Осиё чемпионати давомида ўз тоифасида муваффақиятли иштирок этган Шахрам Ғиёсов якунда олтин медаль билан тақдирланди.

Роньель Иглеcиас

Туғилган санаси: 14/08/1988

Бўйи: 182 см

Асосий зарбани чап қўлда беради

Халқаро ареналарда қўлга киритган совринлари:

2015 йил. Пан-Америка Ўйинлари – Кумуш медаль соҳиби

2012 йил. XXX ёзги Олимпия ўйинлари – Олтин медаль соҳиби

2008 йил. XXIX ёзги Олимпия ўйинлари – Бронза медаль соҳиби

Шахрам Ғиёсов

Туғилган санаси: 07/07/1993

Бўйи: 177 см

Асосий зарбани ўнг қўлда беради

Халқаро ареналарда қўлга киритган совринлари:

2017 йил. Бокс бўйича Осиё чемпионати – Олтин медаль соҳиби

2016 йил. XXXI ёзги Олимпия ўйинлари – Кумуш медаль соҳиби