WSB ярим финал жуфтликлари аниқланди ёхуд “Uzbek Tigers” учун VIII мавсум якунланди

Бутунжаҳон бокс сериялари (WSB) VIII мавсумининг ярим финал иштирокчилари аниқланди.

Рақобатларга бой ўтган мавсумнинг гуруҳ босқичи беллашувларида жамоалар учта минтақага бўлинган ҳолда курашга киришган эди. 13 ҳафталик қарама-қаршиликлардан сўнг плей-офф босқичи форматига ўзгартириш киритилди ва унинг таркиби тасдиқланди. Бу ҳақда WSB расмий сайти хабар бермоқда.

Унга кўра, гуруҳ босқичида энг юқори натижа қайд этган 4 жамоа ярим финал иштирокчисига айланди. Дастлабки учрашувлар 18-19 май кунлари бўлиб ўтса, жавоб беллашувлари 25-26 май кунлари ташкил этилади.

Саралаб олинган тўрт жамоа вакиллари иштирокида учрашув Лозаннадаги WSB штаб-квартирасида ўтди ва ярим финал жуфтлари аниқлаб олинди.

“British Lionhearts” (Буюк Британия) vs “Astana Arlans” (Қозоғистон)

“Fighting Roosters” (Франция) vs “Cuba Domadores” (Куба).

“British Lionhearts” VI мавсумдан бери етакчилар сафидан ўрин эгаллаб келмоқда. Бу мавсум бу жамоа 6 учрашувдан 5 тасида ғалаба қозониб, “В” гуруҳида биринчи ўринни банд этди.

Инглиз жамоаси финал остонасида Олимпия ўйинларида тобланган ва иқтидорли боксчилар бой бўлган WSB мусобақасининг уч карра ғолиби “Astana Arlans” билан рўбарў келади. Қозоғистон жамоаси ҳам бу босқичга қадар атиги бир марта мағлубият аламини тортган, бироқ WSB чемпионлигини ҳимоя қилишга тайёр.

Иккинчи ярим финалда эса Европа минтақасида “British Lionhearts” билан бир хил очко жамғарган Франциянинг “Fighting Roosters” жамоаси амалдаги вице-чемпион “Cuba Domadores” билан куч синашади.

Ҳар икки жамоа ҳам мавсумни кўтаринки руҳда ўтказмоқда, аммо гуруҳ босқичида икки карра WSB чемпиони “Cuba Domadores” француз жамоасидан атиги бир очко кам жамғарган холос.

Ярим финал тўқнашувларидан сўнг 5:5 ҳисоби қайд этилган тақдирда жамоалар қўшимча жангга мурожаат қилишади. Ярим финал учрашувлари дуранг билан якунланганда 69 кг вазнда боксчилар ғолибни аниқласа, финалда 64 кг вазнли боксчилар чемпион жамоа номига аниқлик киритади.

Эслатиб ўтамиз, “Uzbek Tigers” А” гуруҳидан Америка минтақаси жамоалари – амалдаги вице-чемпион “Cuba Domadores” (Куба), “Colombia Heroicos” (Колумбия) ва “Caciques Venezuela” билан бирга гуруҳ баҳсларида иштирок этди. Ўтказилган 6 учрашувнинг 4 тасида ғалаба ва 2 мағлубият қайд этган “Uzbek Tigers” 13 очко жамғариб, “А” гуруҳида иккинчи ўринни эгаллади. Биринчи ўрин “Cuba Domadores” боксиларига насиб этган эди. Улар 15 очко жамғаришган.