Хуммельс ва Видаль "Майнц"га қарши баҳсни асосий таркибда бошлашади

Мюнхеннинг “Бавария” клуби футболчилари Матс Хуммельс ва Артуро Видаль бугун бўлиб ўтадиган Бундеслиганинг 4-турида “Майнц”га қарши баҳсни асосий таркибда бошлашадиган бўлди. Бу ҳақда жамоа бош мураббийи Карло Анчелотти клуб расмий сайтига берган интервьюсида айтиб ўтди.

Эслатиб ўтамиз, Хуммельс жорий ҳафтада бўлиб ўтган Чемпионлар лигаси гуруҳ босқичининг илк турида “Андерлехт”га қарши ўйинни ўтказиб юборган эди. Айтиш лозимки, германиялик футболчига шу куни мураббийнинг ўзи дам беришга қарор қилган. Видаль эса дисквалификация сабаб баҳсни ўтказиб юборган эди.

Шунингдек бугунги учрашувда Давид Алаба ва Хуан Бернат каби футболчилар “Бавария”га ёрдам беришолмайди.

Маълумот  учун, “Бавария” ҳамда “Майнц” жамоалари ўртасидаги баҳс бугун Тошкент вақти билан соат 18:30да старт олади.