Завиша Милославлевич: Андижонда болалар футболи учун шароитлар етарли, фақат режа бўйича ишлаш керак

Аввалроқ юртимизга болалар футболи бўйича сербиялик мутахассис Завиша Милославлевичнинг келганлиги ҳақида хабар берган эдик. 56 ёшли мутахассис кеча жойлардаги болалар футболи мураббийлари билан учрашиш, у ердаги ҳолатни ўрганиш мақсадида Андижон вилоятига ташриф буюрди.

Ташриф чоғида SPORTS.uz мухбири Завиша Милославлевич билан қисқа интервью уюштиршга муваффақ бўлди. Айтиш лозимки, вилоятдаги футболга яратиб берилган шароитлар сербиялик мутахассисда илиқ тассурот қолдирди.

 - Завиша Милославлевич авваламбор юртимизга ташриф буюрганингиздан жудаям мамнунмиз. Мана, ташрифингизнинг биринчи кунидаёқ Андижон вилоятига келдингиз ва бу ердаги болалар футболига яратиб берилган шарт-шароитлар билан яқиндан танишдингиз. Сизнинг бу ҳақдаги илк тассуротларингиз қандай?

 - Авваламбор, менга кўрсатилган меҳмондўстлигингиз учун катта раҳмат. Андижондаги болалар футболига яратиб берилган имкониятлар очиғи мени жудаям қувонтирди. Вилоятда кўздан кечирган футбол мактаблар, стадионлар ва улардаги шароитлар яхши. Фақат, бундай имкониятлардан тўғри фойдаланиб, аниқ режа бўйича иш олиб бориш керак.

- Мана сиз болалар футболини ривожлантириш бўйича ўз режангизни кўрсатиб, бу ҳақда тушунча бериб ўтдингиз. Ушбу дастурлар ўз мевасини беришига ишонасизми?

- Биласизми, футбол бу – жараён. Мен айтган режа бу ўзига ҳос пирамидага ўхшайди. Тўғри, биз ўз мақсадимизга 1-2 йилда етамиз деб айта олмайман. Балким бунга 10 йил кетар, лекин меҳнатларимиз самара беришига ишонаман.

- Фарзандларингиз ҳам футбол соҳасида фаолият олиб боришадими?

- Ўғлим мен каби мураббий. У ҳозир Хитойнинг Шанхай шаҳридаги ҳусусий футбол академияларининг бирида мураббийлик қилмоқда. Қизим эса таэквандо бўйича жаҳон чемпиони.

- Андижон палови ҳақида икки оғиз.

- Биласизми, Қирғизистонда ишлаб юрган пайтларимда ушбу таомни савиб тановвул қилардим. Лекин, Андижонники бошқача экан. Мазасига гап йўқ.

- Мазмунли суҳбатингиз учун катта раҳмат. SPORTS.uz интернет портали сизнинг Ўзбекистондаги бўлажак фаолиятингизга омад тилаб қолади.

- Сизга ҳам раҳмат.

Эслатиб ўтамиз, Завиша Милославлевич ЎФФ президенти Умид Аҳмаджоновга мамлакатимизда болалар футболини ривожлантириш бўйича ўз дастурини тақдим этган. Агар унинг дастури ЎФФ раҳбариятига маъқул келса, у 3-ҳудуд ҳисобланган водийда (Андижон, Фарғона, Наманган вилоятларида) иш олиб боради.

Фикрлар

Фикр қолдириш учун авторизациядан ўтинг!