"Арсенал" Обамеянг ва Мхитарян билан келишувга эришди

Лондоннинг “Арсенал” клуби қишки трансферлар даврида иккита супер трансферни амалга оширишга яқин турибди.

Goal.com интернет нашри тарқатган хабарга кўра “Манчестер Юнайтед” ярим ҳимоячиси Генрих Мхитарян ва “Боруссия” Дортмунд форварди Пьер-Эмерик Обамеянг “канонирлар” билан шахсий келишувга эришишган. Ўз навбатида “Арсенал” раҳбарияти ҳам ушбу икки футболчининг тез орада Лондонга кўчиб ўтишига шубҳа қилмаяпти.

Юқоридаги манбаанинг ёзишича “канонирлар” арманистонлик футболчининг агенти Мино Райола билан унинг маоши борасида келишувга эришишган. Унга кўра Мхитарян “Арсенал”нинг энг кўп маош олувчи футболчиларидан бирига айланади.

Обамеянгнинг трансферига келадиган бўлсак, лондонликлар габонлик футболчи учун “Боруссия” сўраётган 55 млн фунтни беришмоқчи. Бундан ташқари, “Арсенал” форварди Оливье Жиру ушбу трансфернинг бир қисмига айланиши ва Дортмундга йўл олиши мумкин.