Arveladze mag‘lubiyatga qanday izoh berdi?
Osiyo Chempionlar ligasining 3-turida Toshkentning "Paxtakor" klubi Saudiya Arabistonining "Al-Hilol" jamoasiga qarshi bahs olib bordi va 2:1 hisobida mag‘lubiyatga uchradi.
Bellashuvdan keyingi matbuot anjumanida "sherlar" ustozi Shota Arveladze bahs haqida o‘z fikrlarini bildirib o‘tdi.
"Bugungi uchrashuv haqida nima deyishga ham hayronman, judayam og‘ir o‘yin bo‘ldi. Hakamlar qarori bo‘yicha, albatta e’tirozlarim bor. Qizil kartochka ko‘rsatilgan vaziyatda o‘yindan tashqari holat bor edi, buni hakamlar ko‘rmadi.
Birinchi bo‘limda biz to‘liq ustunlik qilganimizga qaramay, bo‘lim yakunida yuzaga kelgan jarima zarbasidan gol o‘tkazib yubordik. Umuman olganda, biz bellashuvga yaxshi tayyorgarlik ko‘rgan edik, bahs qiyin o‘tishini bilgandik va o‘ylashimcha, biz o‘z darajamizni ko‘rsata oldik, ammo so‘nggi daqiqalarda alamli golni qo‘yib yubordik. Keyingi uchrashuvgacha, albatta o‘z xatolarimiz ustida ishlaymiz. Bir qator, yaqqol golli vaziyatlardan foydalana olmadik va mana shu ham bizga pand berib qo‘ydi.
Ortiqcha xatolarni ko‘rmadim. O‘zim bilgan kamchiliklar ro‘y berdi. "Al-Hilol"ga qarshi uchrashuv dars berdi, deya olmayman. Biz yomon o‘yin ko‘rsatmadik, ustunlik ham biz tomonda bo‘ldi. Shuning uchun, javob o‘yinida "Al-Hilol"ni bemalol mag‘lub etsa bo‘ladi," - dedi Arveladze.
Fikrlar