Baxtiyor Ashurmatov: "Jamoamizning salohiyati kuchli oltilikka kirishga etadi"

Superliganig 2-turidan o‘rin olgan "Nasaf" - "Turon" uchrashuvi bo‘lib o‘tdi. O‘yin 2:1 hisobida mezbonlar g‘alabasi bilan yakun topdi.

 Uchrashuvdan so‘ng mehmonlar bosh murabbiyi Baxtiyor Ashurmatov o‘z fikrlarini bildirib o‘tdi.

"Jangovar o‘yin bo‘ldi. Afsuski, jarohatlar sabab o‘zimiz istagan vaqtda o‘zgarishlarni amalga oshira olmadik. Futbolda kichik faktorlar ham katta ahamiyatga ega. Uchrashuv oxirida yakkakurashda imkoniyatni boy berdik va e’tiborsizlik natijasida to‘p gol o‘tkazib yubordik. To‘g‘ri, ikki bahsda ikki bor mag‘lub bo‘ldik, ammo o‘ylashimcha, futbolchilar shunday kurashishda davom etsa, kerakli natijani albatta qo‘lga kiritamiz.

“Nasaf” o‘z o‘yini bilan bizni ko‘p harakat qilishga majbur qildi. Ko‘p vaqt to‘psiz qoldik va shu sabab jismonan tez charchadik. Bellashuv so‘nggida 5 himoyachi bilan o‘ynamoqchi edik. Quvondiq Ro‘ziev jarohat oldi, uni o‘zgartira olmadik. Boisi, zaxira almashtirishlaridan foydalanib bo‘lgan edik. Bu ham o‘z ta’sirini o‘tkazdi. Futbolchilar to‘p nazoratini o‘zlarida saqlab turishganida, bahs yakunida darvozamiz oldida bosim yuzaga kelmagan bo‘lardi. Shunday bo‘lsada, yigitlar bugun mag‘lubiyatga munosib emas edilar. Lekin bu futbol. Daqiqalar, soniyalar ham ko‘p narsani hal qiladi.

Ro‘ziqul Berdiev mamlakatimizdagi eng kuchli mutaxassislardan biri sanaladi. Qarshiliklarning tarkibi deyarli o‘zgarmadi va jamoaviy o‘yini yaxshi shakllangan. Bizga esa biroz vaqt kerak. Jamoamizning salohiyati kuchli oltilikka kirishga etadi”, – dedi mutaxassis.