Бекободликлар устози учун охирги имкониятми? "Андижон"нинг муваффақиятлари сири нимада? "Металлург" бош директори бўлажак рақиб ва жамоаси ҳақида

Бекободнинг “Металлург” клуби чемпионатни бир текисда ўтказа олмаяпти. Турнир жадвалида жамоа 13-ўринда. Ҳисобида 3 тадан дуранг ва мағлубият бор. Ҳозирча Суперлигада ғалаба қозониш бу жамоага насиб қилмаяпти. Олдинда эса “Металлург”ни сафарда “Андижон”га қарши оғир учрашув кутяпти. “Металлург” клуби бош директори Шавкат Саидов Sports.uz учун муҳим масалаларда фикрларини билдириб ўтди.

Ортда қолган ўйинлар хусусида

- Биринчи ўйинда “Локомотив”га қарши устунлик биз томонда эди. Бу футбол. Охирги дақиқаларда рақиб гол уриб кетди. Кейин “Сўғдиёна” билан дурангга имзо чекдик. Ўша учрашувнинг иккинчи бўлимида бизда устунлик кўпроқ эди. 3-турда Фарғонада жуда яхши ўйин бўлди. Ўша учрашувда камида дуранг бўлиши керак эди. У ерда ҳам охирги дақиқаларда гол ўтказиб юбордик. 4-турдаги ўйиндан жуда хафа бўлдим, учрашувдан кейин футболчилар билан ҳам қаттиқ гаплашиб олдик. “Динамо”ни биринчи бўлимдан кейин 1:0 ҳисобида ютаётгандик. Иккинчи бўлимда Тошқўзиев қизил карточка олганидан кейин ўйин умуман ўзгарди, ташаббус “Динамо”га ўтиб кетди. Унда ҳам рақиб иккинчи голини 90-дақиқада киритди. 4 та учрашувдан хулоса қиладиган бўлсак, кўпроқ омад келмаяпти. “Пахтакор”га қарши беллашувда очиқ футбол бўлди. Лекин ўша ўйиндан кўнглим тўлмади. Чунки битта учрашувда 4 та гол ўтказиб юбориш, жуда кўп ва керакли муаммолар борлигини билдик. Мураббийлар штаби билан камида уч соатгача ўйинларимизни таҳлил қилдик. Статистикага, фактларга таянган ҳолда ҳар бир мураббийни фикрларини эшитдик ва “Қизилқум” билан беллашувдан олдин таркибда керакли ротацияларни амалга оширдик. Кўрган бўлсангиз, охирги турда яна омад келмади, пенальтидан гол ура олмадик. Далер Шариповнинг ўзида учта яққол имкониятлар бўлганди. Шахзод Убайдуллаев пенальтидан фойдалана олмади. Бу футбол. Уларга нисбатан қандайдир кескин чора кўрсангиз, қайтанга руҳият яна орқага кетиб қолиши мумкин. Жамоада ўйин ва имкониятлар борлиги бироз бўлса-да, бизни кўнгилга таскин бериб турибди. Ойни ўн беши юруғ, ўн беши қоронғу деган гап бор. Ўн беши қоронғу кунлари ўтиб кетар, деган умиддамиз. Ўзбекистон Кубогида яхши ўйнадик, Фарғонада ажойиб ўйин бўлди. Биз ҳам, “Нефтчи” ҳам оптимал таркиб билан ўйнади. Ҳали ҳам потенциалимизга, футболчиларга ва мураббийларга ишонамиз. Май ойида яна ўйинларимиз бор. Керакли хулосаларни чиқарганмиз. Ўйин жиҳатидан интизомни янада мустаҳкамласак ўйлайманки, ҳали керакли натижаларга эришамиз. Олдинда битта захира ўйинимиз ҳам бор. Вазиятни тўғриласа бўлади.

Набватдаги беллашув Стешевич учун охирги имкониятми?

- Йўқ, бунақа гап-сўз мавжуд эмас. Бу ассосиз гаплар. Ҳар холда бирорта раҳбаримиз, ҳомийимиз томонидан муҳокама қилиниб, чақирилгани йўқ. Улар ҳам кўриб, билиб туришибди. “Металлург” ўйини билан камида жадвалда 6-7-ўринларда бўлиши керак эди. Аҳамият берган бўлсангиз, таркибимизда Суперлигада 3-4 йилдан бери ўйнаётган ўйинчилар, ёш иқтидорлар бор. Ўринбоев билан Неъматжонов жароҳатидан фориғ бўлиб сафга қайтишса, янада кучаямиз. Легионерларимиз, масалан Милинкович энди юқори формасига кириб келяпти. Бобанга омад келмаяпти. Биз жамоага ва мураббийлар штабига ишонишда давом этамиз.

“Андижон” ва унинг муваффақиятлари тўғрисида

- Очиғини айтаман, “Андижон”ни бу йилги натижаларини кўриб хурсандман. Сабаби, бу жамоа таркибида “Металлург”да ўйнаган айрим футболчиларни биламан. Абдувоҳид Ғуломов, Фарҳод Бекмуратовлар  билан бирга ишлаганмиз. Бош мураббий Александр Хомяков билан анчадан бери муносабатларимиз яхши. Унинг ёрдамчиси Артём Петросян бир неча йил бизнинг ўринбосарлар жамоамизни бошқарган. Туркиядаги ўқув-машғулот йиғинларида ҳам кўришиб, назорат ўйинларини ҳам биргаликда кузатдик. Бектемир Абдуманнонов “Металлург”даги ажойиб ўйинлари билан танилди. У “Андижон”ни танлади, биз ҳам йўқ демадик. Лекин олдида кўп вариантлар бор эди. Аммо “Андижон” билан келишилди ва кўриб турибсиз, ўз мевасини беряпти. Иккала қанотлари тез. Ҳимояси кучли. Жисмонан бақувват ўйинчилар. Хомяков жисмоний жиҳатга ҳам, тактик тарафга ҳам жуда кучли эътибор беради. “Андижон” ўйин бўйича ҳам ҳали ҳеч бир клубга ютқазгани йўқ. Омад билан боғлиқ деган жойларига умуман қўшилмайман. Бугунги кунгача “Андижон”ни ҳар бир учрашувда ўзининг ўйин услуби яққол кўриниб турибди. “Андижон” ҳозирги жойида муносиб турибди. Бунинг яна бир асосий сабаби шуки, мухлисларининг қўллаб-қувватлаши уларга янада куч ва мотивация беряпти. Қанийди, Суперлиганинг ҳамма жамоаларида шунақанги мухлислар бўлса?! Ўзимиз ҳам футбол ўйнаганмиз. Шуларга ўхшаб фаол мухлислик қилишса, ўйинни темпи ҳам ошади, масъулият янада кучли бўлади. Шунга нисбатан ўйин ҳам ажойиб ўтади. “Андижон” клубига мухлисларининг ёрдами яққол билиниб турибди. 18 май куни ажойиб ўйин гувоҳи бўламиз. Кимдир ғалаба қозонади, қолганини вақт кўрсатади. Руҳий жиҳатдан устунлик “Андижон”да. Бизга ҳам очколар сув ва ҳаводек зарур.