"Боруссия" Обамеянг эвазига "Арсенал"дан Жируни талаб қилмоқда

Лондоннинг “Арсенал” клуби ижрочи директори Иван Газидис, клуб бош-скаути Свен Мислинтат ҳамда клуб юридик бўлими бошлиғи Хасс Фахмилар ниҳоят Дортмундга етиб келишди.

Goal интернет нашрининг ёзишича “канонирлар” вакиллари ҳужумчи Пьер-Эмерик Обамеянгнинг трансфери борасида “Боруссия” раҳбарияти билан музокараларнинг илк раундини ўтказган. Томонлар ҳозирча аниқ бир келишувга эришишганича йўқ, бироқ, 28 ёшли габонлик футболчи “Арсенал”га ўтиш истагини билдирмоқда.

Ўз навбатида дортмундликлар Обамеянгнинг эвазига “Арсенал”дан франциялик ҳужумчи Оливье Жируни талаб қилишмоқда. Шу тариқа 31 ёшли футболчи Обамеянг трансферининг бир қисмига айланиши мумкин.

Эслатиб ўтамиз, бундан аввалроқ “Арсенал” Обамеянг учун “Боруссия”га 50 млн евро таклиф қилгани, лекин, немис клуби тўпурар футболчиси учун 70 млн евро сўраётгани ҳақида хабарлар тарқалган эди.