Бу факт: Ўзбекистон U-23 ўз тарихида илк бор ОЧ чорак финалига чиқди

Бугун Хитойда 23 ёшгача бўлган терма жамоалар ўртасидаги Осиё чемпионати гуруҳ босқичининг “А” гуруҳи 3-туридан ўрин олган икки учрашув бўлиб ўтди.

Равшан Ҳайдаров бошчилигидаги терма жамоамиз Уммонга қарши саф тортди ва 1:0 ҳисобида зафар қучди. Параллель равишда кечган баҳсда эса турнир мезбони Хитой ёшлари Қатарга 1:2 ҳисобида имкониятни бой берди.

Шу тариқа, Қатар ОТЖ 9 очко билан гуруҳда биринчи ўринни эгаллади. Ўзбекистон ОТЖ эса 6 очко билан чорак финалга чиқди.

Қайд этиш керакки, Ўзбекистон ёшлари ўз тарихида илк бор U-23 Осиё чемпионати чорак финалига йўл олмоқда.