"Металлург" сафига янги футболчилар келиб қўшилди

Бекободнинг “Металлург” клуби янги мавсум учун тайёргарликни Тошкентда олиб бормоқда.

Клуб мабтуот хизмати тарқатган хабарга кўра, бу ҳафта мураббийлар штаби кўригидан 30 дан зиёд футболчилар ўтишмоқда. Янги келган ўйинчилар орасида мамлакатимиз футбол ишқибозларига Фарғонанинг “Нефтчи” жамоасидаги фаолияти орқали яхши таниш бўлган Дилёрбек Ирматов ҳам бор.

Шунингдек, машғулотларда “Металлург” футбол клубининг ўтган йилги ёшлар таркибидан келган ўйинчилардан ташқари “Пахтакор”, “Бунёдкор” сингари футбол клублари ўринбосарлари ҳам кўрикдан ўтишмоқда.

Бугун футболчилар икки таркибга бўлинган ҳолда кичик назорат учрашувини ўтказишди. Унда Зоҳид Абдуллаев етакчилигидаги асосий таркиб аъзолари сардор томонидан киритилган икки гол эвазига ғалаба қозонишди. Машғулотлар якунлангач бир қатор футболчиларга жавоб берилди.

Шанба куни ушбу ҳафта якунлари “Бунёдкор” ёшлар жамоасига қарши назорат учрашуви билан интиҳо топади. Бу назорат ўйинидан кейин кўрикда турган яна бир қатор футболчиларнинг тақдирига ойдинлик киритилади.