Ўринбоев Англияга қандай бориб қолди?

Муҳаммадали Ўринбоев 2005 йилнинг 24 апрель куни спортчилар оиласида туғилган. Акаси Забиҳилло ҳам футболчи эканини кўпчилигимиз яхши биламиз. Унинг амакиваччаси Яҳё Ўринбоев ҳам “Пахтакор” академияси тарбияланувчиси ва 17 ёшгача бўлган футболчилардан таркиб топган терма жамоамиз сафида жаҳон чемпионатида тўп тепиб, мухлису мутахассислар эътиборини қозонди.

Муҳаммадали футболчилик фаолиятини 5 ёшида “Спартак Чиғатой” жамоасида бошлаган. Унинг илк мураббийи Сергей Арслонов бўлган. 11 ёшидан “Пахтакор” академиясида Фарҳод Нишонов мураббийлигида шуғулланган.

Истеъдодли футболчи профессионал фаолиятидаги дебютини 2021 йилнинг 25 октябрь куни “Сўғдиёна”га қарши учрашувда ўтказган ва ўша мавсумда майдонга тушган энг ёш футболчи бўлганди (16 ёшу 183 кунлик).

Муҳаммадали “Пахтакор”даги дебют голини эса 2022 йилнинг  23 августида  Ўзбекистон кубоги доирасида “Шўртан” клубига қарши ўйинда киритган эди. Осиё Чемпионлар лигасидаги дебют эса, 2023 йилнинг 24 октябрида ўтказилган Туркманистоннинг “Аҳал” жамоасига қарши учрашувга тўғри келди.

Клубдаги фаолият, албатта муҳим, лекин ҳужумкор ярим ҳимоячи учун терма жамоа ҳақиқий трамплин вазифасини бажарди. Дастлаб, 2021 йилда Сервер Жепаров бошчилигидаги U-17 терма жамоасида дебют қилган бўлса, бир йилдан кейин, тажрибали мураббий Рауф Инилеевнинг U-18 термасида ҳаракат қила бошлайди ва 2022 йилнинг  октябрь ойида терма жамоага Фарҳод Нишонов мураббий этиб тайинланади.

Юқорида эслаб ўтганимиздек, Нишонов Ўринбоевнинг “Пахтакор”даги устози эди. Бош мураббий Муҳаммадалининг имкониятларини яхши билган ҳолда майдондаги энг катта вазифа – ўйинни бошқаришни унга ишониб топширади. Шу йилнинг ноябрь ойида Туркияда мезбонларга қарши ёшлар термамиз 2 та ўйин ўтказади. Иккала учрашувда ҳам терма жамоамиз мағлуб бўлганига қарамай, Ўринбоев скаутлар назарига тушади.

2023 йилнинг баҳорида Тожикистонда ташкил этилган “CAFA U-20 Championship” мусобақасида Ўринбоев 4 учрашувда 2 гол ва 2 ассист қайд этиб, чемпионликка муносиб ҳисса қўшади. Муҳаммадали мусобақанинг “энг яхши футболчиси” соврини ҳам қўлга киритади.

Ёзда келишувга кўра, Туркияга қарши яна иккита ўртоқлик ўйини ўтказилади. Мана баҳслардан кейин 23 июнда Туркиянинг “FutureBall” агентлиги истеъдодли футболчимиз билан  шартнома имзолаганини эълон қилади.

Бу агентлик Энес Унал, Женгиз Ундер, Ведат Мурики, Ўзан Туфан каби номдор футболчиларннг ҳам манфаатини ҳимоя қилади.

Туркиядаги ўртоқлик учрашувларида Муҳаммадали Ўринбоевнинг ўйинларини “Брентфорд” скаутлари кузатиб борганини футболчининг ўзи интервьюсида маълум қилган эди.

Муҳаммадали интервьюсида “Бренфорд”га 2023 йилнинг ёзида йўл олмоқчи бўлганини таъкидлаган. Бироқ, Англия футболида янги қоида киритилиб, футболчилар бу мамлакатда ўйнаш учун Governing Body Endorsement (GBE) рейтингида балл жамғариш талабини бажариши керак.

Ўринбоев ёзда етарли даражада балл жамғара олмагани учун унинг трансфери қишда амалга оширилди.

Мана энди 18 ёшли футболчимиз “Брентфорд Б” жамоасида дебютини нишонлаб, мутахассислар томонидан ижобий баҳони ҳам олиб бўлди. Унга ўзбекистонлик футбол ишқибозлари номидан келаси фаолиятида муваффақият тилаймиз.

Легионеримиз Англияда ўйин ўтказади

Фарҳод Тулкунов

ЎзЖОКУ талабаси