Расман! Ғофуров "Металлург" футболчиси

Қишки трансфер ойнасидан фойдаланган «Металлург» ПФК таркибини Суперлиганинг тажрибали ўйинчиларидан бири билан бойитди. Ўтган мавсумни «Сўғдиёна» жамоасида ўтказган ҳужумчи Ҳусниддин Ғофуров «Металлург» жамоаси билан шартнома имзолади.

Ҳусниддин футболчилик фаолиятини “NBU Осиё” жамоасида бошлаб, қисқа муддат ичида хориж жамоасига ўтиб кетган кам сонли ўзбек футболчиларидан бири саналади. 2013 йилда Сербиянинг «Явор» жамоаси билан шартнома имзолаган Ғофуров кейинчалик «Младост» клубида ҳам ўйнади. 2018 йилдан эътиборан эса Суперлигамизга қайтди.

Илк мавсумдаёқ «Локомотив» таркибида Ўзбекистон чемпионатида шоҳсупанинг юқори поғонасига кўтарилди. Кейинги мавсумда эса «Пахтакор» билан олтин медалга сазовор бўлди. У шунингдек, Термизнинг «Сурхон», Олмалиқнинг АГМК, Фарғонанинг «Нефтчи» ҳамда Жиззахнинг «Сўғдиёна» жамоаларида ўйнади.

Ҳусниддин Ғофуров икки карра Ўзбекистон чемпиони (2018, 2019), Ўзбекистон Кубоги соҳиби (2019). Суперлигада 105 та ўйинда майдонга чиққан, 8 та гол киритган, 13 марта сариқ карточка билан жазоланган.

Ҳусниддин Ғофуров, 28 ёшда.

1994 йилнинг 29 июль санасида Фарғона вилоятида туғилган.

Бўйи – 176 см

Вазни – 74 кг

Амплуаси - ҳужумчи

“Металлург” матбуот хизмати.