Роналдиньо расман футболчилик фаолиятини якунлади

Каталониянинг “Барселона” клуби ҳамда Бразилия терма жамоасида узоқ йиллар тўп сурган ярим ҳимоячи Роналдиньо ўзининг футболчилик фаолиятини якунлаганлигини эълон қилди. Бу ҳақда 37 ёшли футболчининг акаси ва агенти ҳисобланган Роберто де Ассиш Globo Esporte нашрига маълум қилган.

“Роналдиньо фаолиятини якунлади. Ҳаммаси тамом. Балким, ЖЧ-2018дан сўнг нимадир ташкиллаштирармиз. Бразилиядами, Осиёдами ёки Европада...Лекин албатта Бразилия терма жамоаси таркибида ўйин ташкиллаштирамиз”, - дейди Ассиш.

Эслатиб ўтамиз, Роналдиньо сўнгги марта 2015 йил «Флуминенсе» таркибида расмий учрашувда иштирок этган эди. У шунингдек фаолияти давомида «Керетаро», «Атлетико Минейро», «Фламенго», «Милан», «Барселону», «ПСЖ» ва «Гремио» каби жамоаларда ҳам тўп сурган.

Роналдиньо “Барселона” таркибида икки карра Испания чемпиони ва Чемпионлар лигаси ғолиби бўлган. “Милан” сафида эса А Серияда чемпионлигини қўлга киритган. У шунингдек Бразилия терма жамоаси сафида 1999 йил Америка кубогида, 2002 йил жаҳон чемпионатида ва 2005 йил конфедерациялар кубогида ғолиб чиққан.