Шамшир йўналишида жаҳонга машҳур мураббий Игорь Чикинёв Ўзбекистон термасида иш бошлади

 

Бугун, 1 март куни Миллий олимпия қўмитасида Ўзбекистон қиличбозлик федерацияси таклифига кўра пойтахтимизга етиб келган эстониялик мураббий Игорь Чикинёв иштирокида матбуот анжумани ташкил қилинди.

Ушбу анжуманда шунингдек, Ўзбекистон Миллий олимпия қўмитаси Бош котиби Жасур Матчанов, Жисмоний тарбия ва спорт вазири ўринбосари Ойбек Касимов, Ўзбекистон қиличбозлик федерацияси Бош котиби Муҳаммад Ҳумоюн Ибрагимов, ёш қиличбозлар, мураббийлар ва ОАВ вакиллари иштирок этишди.

Тадбирни Ўзбекистон қиличбозлик федерацияси Бош котиби Муҳаммад Ҳумоюн Ибрагимов олиб борди. У анжуман бошида янги мураббий фаолияти билан таништирди. Шундан сўнг Ойбек Касимов сўзга чиқиб, бундан буён Ўзбекистон қиличбозлик бўйича ҳам ўз олдига юқори мақсадларни қўйишини, шу сабабдан ҳам ушбу тажрибали мутахассис терма жамоамизга жалб этилгани ҳақида гапирди. 

Миллий олимпия қўмитаси Бош котиби Жасур Матчанов эса қиличбозлик спортини янада ривожлантириш учун мамлакатимизда барча шароитлар мавжудлиги, фақат улардан унумли ва самарали фойдаланиш зарурлигини таъкидлади ва шу билан биргаликда Игорь Чикинёвга терма жамоамиздаги фаолиятида омадлар тилади.

"Менга шундай ишонч билдирилаётганидан хурсандман. Ўзбекистонда қиличбозлик билан шуғулланиш учун жуда яхши шароитлар яратилган. Ишонаверинг. Мен сўнгги беш йил ичида Эстонияда ишладим. Бундай шароит у ерда йўқ. Тўғри, Эстонияда яхши мактаб ва анъаналар мавжуд, аммо, шароит бўйича солиштирадиган бўлсак бу борада Ўзбекистонда имконият катта.

 Ўзбекистон сўнгги пайтларда ҳар жабҳада шиддат билан ривожланмоқда. Оддий мисолни келтириб ўтсам. Ўтган йилнинг декабрида бу ерга келганимда аэропортда менга қандайдир тушунарсиз қоғозларни тўлдиришимни айтиб, бир ярим соат вақтимни олишганди. Бу жуда ёқимсиз ҳолат. Икки ой ўтиб, кеча мамлакатингизга яна келдим. Биласизми, Тошкент халқаро аэропортида ортиқча вақт сарфлаб ўтирганим йўқ. "Яшил йўлакча" орқали ўтдим ва ортиқча қоғозбозликсиз тезда аэропорт худудидан шаҳарга чиқдим. Атиги икки ой ичида халқаро стандартларга тўла мос келадиган бу ўзгаришларнинг рўй бергани Ўзбекистон ривожланиш масаласида дадил қадамлар ташлаётганини кўрсатиб турибди. Бу катта нарса. Ишонаманки, қолган соҳалар ҳам жадаллик билан олдинга силжимоқда", - деб сўз бошлади Игорь Чикинёв.

Шундан сўнг йиғилганлар тажрибали мутахассисга ўзларини қизиқтирган саволлар билан мурожаат қилишди.

"Яратилган шароитлардан тўғри фойдаланиб, барчасини изга тушириб олишимиз керак. Ўзбекистон ҳукумати спортни ривожлантириш учун катта эътибор қаратмоқда. Қолаверса, юртингизда спорт соҳасига жуда катта маблағлар киритилмоқда. Ўз вақтида Собиқ Иттифоқ, Швеция, Эстония терма жамоаларида фаолият олиб борганман. У ердаги тизимларнинг барчаси бир-биридан фарқ қилади. Мақсадим бу ердаги спортчиларнинг савиясини кўтариш. Ҳозир бу ердаги ёшларнинг иқтидорли эканлиги хақида ортиқча тўхталиб ўтирмайман. Шуниси аниқки, ёшларда иқтидор ва салоҳият бор. Осиёликлар тезкор ва чидамли бўлади.

 Қитъада кучли терма жамоалар етарли. Жанубий Корея дунё миқёсида етакчилардан бири ҳисобланади. Улар бундай савияга бирданига чиқиб олишмаган. Бунинг учун 15-20 йил вақт кетган. Улар ҳам бошида хорижлик кучли мураббийларни таклиф этганлар. Видеороликлардан кенг фойдаланишган. Шундай экан, савияни ошириш учун бу ерда ҳам имкониятлар етарли. Агар бунга ишонмаганимда 2,5 йил Ўзбекистонда ишлашга рози бўлиб ўтирмасдим.

Аввалига Олимпия ўйинларига лицензия олиш учун ҳаракат қиламиз. Аммо бу осон бўлмайди. Осиёда асосий фаворитлар Жанубий Корея ва Япония. Шунингдек, Қозоғистон, Қувайт, Сингапур каби мамлакатлар ҳам кучли ҳисобланади. Аммо биз имкон қадар кучли рақобатни енгиб ўтиб Олимпия ўйинлари лицензиясини қўлга киритишга ҳаракат қиламиз", - деди шамшир бўйича Ўзбекистон терма жамоасининг янги мураббийи.

Маълумот учун, 2017 йилнинг 4 - 12 декабрь кунлари Ўзбекистон Миллий олимпия қўмитаси Ўзбекистон қиличбозлик федерацияси билан ҳамкорликда спортнинг ушбу тури мураббийлари учун ўқув-техник семинар ташкил этганди. Ўша семинарни олиб бориш учун Игорь Чикинёв юртимизга таклиф этилганди. Ўзбекистон қиличбозлик федерацияси раҳбарияти эса ўша вақтдаёқ эстониялик мутахассис билан шартнома имзолашни ва терма жамоа бошқарувига жалб этишни мақсад қилиб қўйганди. Орадан 2 ой ўтиб ушбу келишув амалга ошди ва Чикинёв Токио 2020 Олимпия ўйинларига қадар терма жамоамизда фаолият кўрсатадиган бўлди.

Фикрлар

Фикр қолдириш учун авторизациядан ўтинг!