Toshkentdagi jahon chempionati doirasida ommaviy mushtlashuv yuz berdimi? - O‘zbekiston boks Federatsiyasi munosabat bildirdi
Boks bo‘yicha Toshkent mezbonlik qilgan jahon chempionati doirasida Xalqaro boks assotsiatsiyasi (IBA) tomonidan ushbu sport turining ommaviyligini yanada oshirish bo‘yicha bir qator tadbirlar tashkil etish ko‘zda tutilgan edi. 13 may kuni IBA rahbariyati “Humo arena” muz saroyida ishtirokchi davlatlarga bepul boks qo‘lqoplari tarqatish aktsiyasini o‘tkazdi. Buning natijasida jarayon davomida kichik tartibsizlik yuzaga keldi.
Ishtirokchi davlatlarning sportchi va murabbiylari, muxlislar navbat kutmasdan bepul tarqatilayotgan qo‘lqoplar tomon tartibsiz harakatlanishdi. Bu holatda yuzaga kelgan vaziyat ijtimoiy tarmoqlarda turlicha talqin qilinmoqda.
O‘zbekiston boks federatsiyasi bu borada shuni ma’lum qiladiki, ushbu holatda hech qanday mushtlashuv yoki boshqa ko‘ngilsiz holat ro‘y bermagan. Vaziyat qisqa fursat ichida huquq-tartibot organlari tomonidan nazoratga olindi, - deya xabar berdi O‘zbekiston boks federatsiyasi matbuot xizmati.
Fikrlar