U-23 ОЧ. Вьетнамда ўйин куни кафеда мижозлар сони ортмоқда (фото)

Хабарингиз бор, айни кунларда Хитойда 23 ёшгача бўлган футболчилар орасида Осиё чемпионати ўйинлари бўлиб ўтмоқда. Ушбу турнирда сенсацион натижалар қайд этилмоқда.

Жумладан, Вьетнам терма жамоаси ўзининг ёрқин ўйинлари билан мухлислар олқишига сазовор бўлмоқда ва улар бежизга финалга чиқишмади.

Ярим финалда Қатар пенальтилар сериясига кўра, мағлуб этилганидан сўнг Вьетнам кўчаларида миллионлаб мухлислар “Вьетнам чемпион” деб ҳайқиришган ва ғалабани нишонлашган.

Қатар устидан қозонилган ғалабада катта хисса қўшганлардан бири бўлган дарвозабон Бу Тьян бу борада ўз фикрларини билдириб ўтди.

“Мен жуда бахтлиман. Ван Тхан (пенальтилар сериясида ғалаба тўпини киритган футболчи) гол киритганида йиғлаб юбордим. Жамоадошларимга ва мураббийларга миннатдорчилик изҳор этаман. Энди буни нишонлашимиз керак”, – деб айтиб ўтган ветнамлик кипер учрашувдан сўнг.

“Синьхуа” агентлигида ёзишларича, Вьетнамдаги кафе эгаларидан бири Нгуэн Тхининг сўзларига кўра, ярим финал баҳси туфайли кофе ва коктейл ичиб, учрашувни томоша қилиш учун унинг кафесига мижозлар келиши ортган.

Эслатиб ўтамиз, Ўзбекистон ҳамда Вьетнам терма жамоалари ўртасидаги финал учрашуви 27 январ куни бўлиб ўтади.