Nursulton Ro‘ziboev Emelyanenko ishtirok etadigan musobaqada ringa ko‘tariladi

Joriy yilning 16 dekabr kuni Rossiyaning Grozniy shahrida aralash yakkakurash jang san’atlari bo‘yicha WFCA 44 turniri bo‘lib o‘tadi.

Mazkur janglar kechasida 77,1 kg vazn toifasida hamyurtimiz Nursulton Ro‘ziboev (13-4) ham ishtirok etadi va navbatdagi jangini rossiyalik Igor Bayerga (4-4) qarshi o‘tkazadi.

Kechaning asosiy janglaridan biri 56,7 kg vazn toifasida tashkilotning birinchi va ikkinchi raqamli sportchilari "Axmat" jang klubi vakillari rossiyalik Yunus Evloev (21-8) va braziliyalik Bruno "Macaco" Azevedo (16-2) titul uchun kurash olib boradi.

Yana bir chempionlik jangi 61,2 kg vaznda o‘tkazilib, unda “Axmat” klubi vakili Abdul-Raxman Dudaev (21-4) engil vaznda The Ultimate Fighter shousi g‘olibi amerikalik Jonathan Brookins bilan kuch sinashadi.

Turnir doirasida “Axmat” klubining mashhur jangchilaridan biri Aleksandr Emelyanenko (24-7) +93 kg vazn toifasida o‘tkaziladigan reyting qarama-qarshiligida sobiq Bellator, Strikeforce jangchisi amerikalik Virgil "Rezdog" Zwicker (16-6-1) bilan to‘qnash keladi.