ОКМКга гол урган "Бухоро" дарвозабони: "Тўғриси, буни ўйламагандим, аммо Бақоев ишонган экан"

“Бухоро” клуби куни кеча Ўзбекистон Кубоги гуруҳ босқичининг охирги турида сафарда ОКМКга қарши майдонга тушди. Учрашув 2:1 ҳисобида олмалиқликларнинг ғалабаси билан якунланиш арафасида “Бухоро” дарвозабони Ширинбой Абдуллаев катта саҳнага чиқди. У охирги сонияларда жамоасига ёрдам бериш учун ОКМК жарима майдони ичига етиб келди ва бурчакдан узатилган тўпни ОКМКдаги ҳамкасбининг дарвозасига киритди. 2:2 натижасидан кейин “Бухоро” кейинги босқичга чиқди. ОКМК эса гуруҳда қолиб кетди. Ҳолбуки, бухороликлар ОКМКга қарши учрашувда 10 футболчи бўлиб қолганди. Шунга қарамай, охирги сонияда дарвозабоннинг голи эвазига жамоа кейинги босқичга йўл олди. Шундан сўнг Sports.uz журналисти Ширинбой Абдуллаевдан интервью олди.

- Ширинбой, дарвозабон бўлсангизда гол уриб “Бухоро”ни мағлубиятдан қутқариб қолдингиз ва кейинги босқичга олиб чиқа олдингиз. Ҳаммаси қандай юз берди?

- Албатта, гол уриб жамоага натижа келтирганимдан хурсандман. Ўйинни қийин ўтишини билардик. Бизни дуранг натижа ҳам қониқтирарди. Шунинг учун учрашув бошидан ҳимояга эътибор қаратдик. Афсуски, биринчи бўлиб гол ўтказиб юбордик. Кейин ҳисобни тенглаштириб олдик. 10 киши бўлиб қолганимиздан сўнг ОКМК яна ҳисобда олдинга чиқиб олди. Бироқ сўнгги сонияларда характер кўрсатиб, ҳисобни тенглаштирдик. Бу голда биргина мен эмас, жамоадошларимнинг ҳам ҳиссаси бор. Учрашувда ҳамма борини берди, барчага раҳмат айтаман.

- Фаолиятингизда аввал ҳам гол урганмисиз?

- Ҳа, бу профессионал фаолиятимда биринчиси.

- Ўша вазиятда рақиб жарима майдони ичига кирганингизда гол уришингизни тасаввур қилганмисиз?

- Ростини айтсам, жарима майдони ичига бормоқчи эмасдим. Чунки ҳали вақт бор, деб ўйлагандим. Лекин Улуғбек Бақоев жарима майдони ичига киришимни айтди. Тўғриси, гол ураман деб ўйламагандим.

- Гол урганингиздан кейин Бақоев сизга нималар деди?

- Гол урганимдан кейин Улуғбек Бақоев олдимга келиб сенга айтгандимку, жарима майдонига киргин, уришингни сезгандим, деган гапни айтди. Ҳамма хурсанд бўлди. Мураббийимиз гол уришимга ишонган экан.

- “Бухоро”нинг Кубокдаги вазифаси қандай? Кейинги босқичда қайси рақибни кутяпсиз?

- Ўзбекистон Кубогида “Бухоро” жамоасига максимал натижа кўрсатиш вазифаси қўйилган. Худо хоҳласа, яхши натижа кўрсатишга ҳаракат қиламиз. Бизга рақиб ким бўлишидан қатъий назар ғалаба учун майдонга тушамиз.

Шуҳратбек Жўраев.