ОФКнинг ютуқли сўровномасида иштирок этинг ва"Орзулар жамоаси"да терма жамоамиз футболчиларига овоз беринг!

Осиё саралашининг учинчи босқичидан сўнг олтита мамлакат 2026 йилги ФИФА Жаҳон чемпионатига йўлланма қўлга киритди. ОФК саралашда ажжойиб ўйин кўрсатган футболчилардан "Орзулар жамоаси"ни яратади.

ЖЧ-2026 саралаши доирасидаги "Орзулар жамоаси" танловида футбол ишқибозлари саралаш босқичидаги севимли 11 нафар футболчиларини танлаш ва турнир ҳақидаги билимларини синаш учун қўшимча саволга жавоб бериш имкониятига эга бўлади.

Ушбу сўровномадан 4 нафар терма жамоамиз футболчилари жой олган. Улар Ўткир Юсупов, Абдуқодир Ҳусанов, Отабек Шукуров ва Аббосбек Файзуллаев.

"Орзулар жамоаси" сўровномасида қандай иштирок этиш мумкин?
Мухлислар ушбу сўровнома https://the-afc.com/asianqualifiers_dreamxi саҳифасига кириб ёки "AFC LIVE" иловасини юклаб, керакли маълумотларни тўлдириб рўйхатдан ўтган ҳолда иштирок этишлари мумкин.

Рўйхатдан ўтгач, иштирокчиларга саралашда ёрқин ўйин кўрсатган 41 нафар футболчидан иборат рўйхат тақдим этилади. Улар орасидан 11 кишилик жамоани тузиш учун битта дарвозабон, учта ҳимоячи, тўртта ярим ҳимоячи ва учта ҳужумчини танлаш керак бўлади.

Мухлислар танловда 4 июлга қадар иштирок этишлари мумкин.

Мухлислар сўровномада иштирок этган ҳолда совға ҳам қўлга киритишлари мумкин!

ОФК томонидан белгиланган "Орзулар жамоаси"га энг яқин таркибни танлаган ва қўшимча саволга тўғри жавоб берган 10 нафар иштирокчи ғолиб деб эълон қилинади.

Тенг балл тўпланган тақдирда, энг аввал рўйхатдан ўтган иштирокчи ғолиб деб топилади ва 10 нафар ғолибнинг ҳар бири 200 АҚШ доллари қийматидаги совға картасини қўлга киритади.