"Зенит" собиқ футболчиси: "Башакшеҳир" Файзуллаевнинг фаолиятида трамплин вазифасини ўташи мумкин"

"Зенит"нинг собиқ ҳужумчиси ва телеэксперт Алексей Гасилин ЦСКА ва Ўзбекистон миллий жамоаси аъзоси Аббосбек Файзуллаевнинг Туркиянинг "Истанбул Башакшеҳир" клубига ўтиши мумкинлиги ҳақида гапирди.

"У катта истеъдодга эга футболчи. Уни бежизга Осиёнинг энг яхши ёш ўйинчиси деб тан олишмаган. У ўз терма жамоасининг етакчиларидан бири, аммо ўтган мавсумда ЦСКАдаги ўрнини йўқотди. У ёрқин бошлади, лекин Николичнинг схемаси унга тўғри келмади. Балки, Туркияга ўтиш унинг учун трамплин вазифасини ўтар. Ўйлайманки, футболчи ва клуб бу трансфердан мамнун", - деди Гасилин "Матч ТВ" телеканали эфирида.

Аввалроқ ЦСКА коммуникациялар бўйича директори Кирилл Брейдо Аббосбек Файзуллаев эҳтимолий трансфер олдидан тиббий кўрикдан ўтиш учун Туркияга учиб кетганини маълум қилганди. 2024/2025-йилги мавсумда футболчи барча мусобақаларда "қизил-кўклар" сафида 39 та ўйин ўтказиб, учта гол урган ва саккизта голли узатмани амалга оширган.