“Ливерпуль” рақибнинг бирданига уч футболчисини олиб қўймоқчи

“Ливерпуль” ёзги трансфарлар даврида таркибида жиддий ўзгаришларга қўл урмоқчи. Бош мураббий Арне Слот келаси мавсум олдидан ўзи қўллайдиган ўйин услубига мос ижрочиларни қидирмоқда.

TEAMtalk нашрининг хабар беришича, ливерпулликлар нишонига Англия Премьер-лигасининг бошқа иштирокчиси – “Борнтмут”нинг бирданига уч футболчиси тушди. “Қизиллар” ёзда ҳимоячилардан Милош Керкез ва Дин Хёйсен, шунингдек, қанот ҳужумчиси Антуан Семеньони олишга уриниб кўради.

“Ливерпуль” Керкезни 31 ёшли Эндрю Робертсонга ўринбосар сифатида кўрмоқда. Бир неча клублар қизиқиш билдираётган Хёйсен Виржил ван Дейк ўрнини босиши мумкин. Муҳаммад Салоҳнинг клубдаги келажаги мавҳум бўлиб тургани мутасаддиларни Семеньога эътибор қаратишига сабаб бўлмоқда.

Англия Премьер-лигасида “Ливерпуль” чемпионликка асосий даъвогар ҳисобланади. Бироқ пешқадамликни таъминлаб турган таркибдан бир неча муҳим ўйинчилар кетиши кутиляпти.