Аллегрининг ўрнини эгаллаши мумкин бўлган мураббийлар маълум қилинди

Туриннинг “Ювентус” клуби бош мураббийи Массимилиано Аллегри мавсум якунида жамоани тарк этиши мумкин. Corriere Dello Sport нашри хабарига кўра, клуб раҳбарияти ушбу мутахассис ўрнини эгаллаши мумкин бўлган мураббийлар рўйхатини маълум қилди.

Манбага кўра, рўйхатдан “Спартак” бош мураббийи Массимо Каррера, Лучано Спаллетти (“Рома”), Роберто Манчини, Паулу Соуза (“Фиорентина”), Леонарду Жардим (“Монако”) ва “Ювентус”нинг ёшлар жамоаси устози Фабио Гроссо ўрин эгаллаб турибди.

Эслатиб ўтамиз, Аллегри бошчилигидаги жамоа “А” серия 25-туридан сўнг 63 очко билан мусобақа жадвалида етакчилик қилмоқда. Бугун тунда туринликлар ЕЧЛ 1/8 финал илк учрашувида “Порту” жамоаси меҳмони бўлишади. Ўйин Тошкент вақти билан 00:45да старт олади.