Миллатлар Лигаси: Испаниянинг «Реал» муаммолари

Қарши ҳужумга асосланиб ўйнаган ёшарган Англия Испанияни 3-2 ҳисобида мағлубиятга учратди. Сўнгг вақтларда анча ёрқин футбол намойиш қилаётган Луис Энрике шогирдлари кутилмаганда Саутгейт термасига ютқазию қўйди. Қуйида ушбу учрашувдан қилинган хулосаларни таҳлил қиламиз.

Буни кутилмаган деяётганимизга сабаб Испания 38 учрашувдан бери илк бор ютқазиб қўйди. Аммо Англия Испанияни ҳақли тарзда мағлубиятга учратди. Хўш, Миллатлар Лигасининг ушбу учрашувидан нималарни ўргандик?

Рэшфорд ва Стэрлингнинг ёрдами

Харри Кейн Англия таркибида Хорватияга қарши голсиз учрашувдан кейин қарийб 500 дақиқалик голсиз сериясини давом эттираётган бир пайтда уни бутун мамлакат танқид қилмоқда. Бироқ у бўлмаса термада гол урадиган бошқаси топилади. Кеча буни Рэшфорд ва Стэрлинглар ижро этиб беришди.

Севильяга сафар қилган ёшарган англияликлар катта босим остида қолишганди. Шунга қарамай улар испанларни парчалаб ташладилар.

Инглизларнинг барча голларига ёш ва ғайратли Рэшфорд ва Стэрлинглар муаллифлик қилишди. Гарет Саутгейтнинг яширин «қурол»лари Лучонинг мустаҳкам ҳимоясини ёриб ўтишнинг уддасидан чиқди. Англиянинг ушбу икки футболчиси кўпчилик томонидан қаттиқ танқид остида қолиб кетаётганди. Аммо «уч шерлар»нинг бахтига улар бу сафар ўзларини ижобий томондан кўрсатишди.

Испаниянинг «Реал» муаммолари

Испания оммавий равишда «Реал» футболчиларини таркибга йиғган. Асосий таркибда Серхио Рамос, Начо ва Марко Асенсио ҳаракат қилган бўлса, захирадан Дани Себальос ўйинга қўшилди. Бундан ташқари илк дақиқалардан ўйнаган Маркос Алонсо ва Родриголар ҳам «Реал Мадрид» футбол академияси тарбияланувчилари ҳисобланади.

Бир вақтлар терма жамоани «Барселона» футболчилари босиб кетганда ўйин ҳам каталонча услубда бўларди. Энди миллий термада «Реал» вакилларининг салмоғи борлиги сабаб ўйин ҳам мадридча кўринишда бўлмоқда. Бу ҳам яхши, ҳам ёмон.

Яхшилигига сабаб, Испаниянинг иккинчи бўлимдаги «камбек»и топ-тоза «қироллик клуби» услубида содир бўлди. Рақибни ортга қайтишга мажбур қилди. Себальос тушиши билан тўп назорати ҳам ортда. Бош билан урилган иккала голнинг барчаси (иккинчиси сўнгги дақиқаларда урилган эътиборга лойиқ) «Реал»ча бўлди.

Ёмон томони эса биринчи бўлимда жуда ёмон ўйнашди. Тартиб йўқ, тўп назорати йўқ. Бускетс ярим ҳимоядаги икки шеригидан ажралиб қолган. Ҳужумчилар тезкор пас кутиб юришди. Ҳимояга келадиган бўлсак бу ҳам «Реал» характерига мос равишда бўлди. Маркос Алонсо Луис Энрикенинг инжиқлиги сабаб таркибга чақирилмаган Жорди Альбани ҳали тўлдира олмаслигини билдириб қўйди. У жуда ожизлик қилди.

Жамоа сардори Рамос ва Начолар ҳақида гапирадиган бўлсак, иккаласи ҳам энг ёмон учрашувларидан бирини ўтказишди. Бироқ Начони айблаш қийин. У фаолияти давомида терма жамоа учун асосий таркиб футболчиси бўлмаган. У Кейнни тутиб туришнинг уддасидан чиқа олмади. Ўтказиб юборилган голларда позицион хатоларга йўл қўйди. У хатто клубда ҳам асосий таркиб вакили ҳисобланмайди. Кечаги учрашувда Начо клубдошига муносиб шерик бўлишга ожизлиқ қилди.

Дунёнинг энг яхши ҳимоячиси бўлиб келган Рамос кеча ҳимояланишдан кўра ҳужум қилишни боплади. Жамоа сардори Эрик Дайерга қаршилик қилишда қийналди. Айнан у ҳимояни тартибга солишда бош-қош бўлиши керак эди. У ҳимоядаги шериги Жерар Пикесиз анча кучсизланиб қолгани яққол билинди.

Жордан Пикфорднинг ишончли ўйини

Пикфорд замонавий дарвозабон эмас. У топ савиядаги дарвозабон ҳам ҳисобланмайди. Унга қараб ҳақиқий инглиз дарвозабонини кўриш мумкин. Югуришда кучли, сейв қилиши даргумон, оёқда тўп билан муомала қилишда ожиз.

Шунга қарамай кеча Пикфордни тўп билан муомала қилиши унинг энг кучли жиҳатига айланди. Пикфорднинг узатмалари Англиянинг дастлабки икки голи учун муҳим аҳамиятга эга бўлди. Унинг узоққа тўпни етказиб бериши якуний натижага таъсир қилди.

Агарда бу кетишда бўлса гранд термаларга қарши ўйнашда Пикфорднинг бу маҳорати жуда асқотиши табиий.

Алькасер порлашда давом этмоқда

Пако Алькасер ушбу мавсумда ҳар 27 дақиқада гол урмоқда. У кеча учрашув тугашига 34 дақиқа қолганида туширилаётганда жаҳли чиққан бўлса ажабмас. У бир дақиқа ўтар-ўтмас Пикфорд дарвозасига боши билан тўпни жойлаб қўйди ва термадошларига куч бағишлагандек бўлди.

Клуб ва термаси учун 10 зарба йўллаган ҳужумчи 100 % лик натижа кўрсатган. 10 зарба 10 гол! Ҳар қандай ҳужумчи хавас қилса арзийди. Айниқса бундай натижага омадсиз мавсумни ўтказганидан кейин кўрсатиши аҳамиятли. У бу кетишда ўйнаса, асосий таркиб ҳужумчисига айланиги ҳеч гапмас.

Англиянинг ромб шаклидаги ўйини

Англия кечаги учрашувда 4-3-3 ўйин схемасида ҳаракат қилган бўлсада, ҳақиқатда кўпроқ ромб шаклида ўйнади. Стэрлинг ўнг қанот вингери вазифасини бажара олмайди, у кўпроқ марказга яқин жойда ҳаракат қилди.

Стэрлинг ва Рэшфорд ҳужумда ҳаракат қилган бўлса, Харри Кейн анъанавий тарзда ҳужумни якунловчи вазифасини бажарди. У камдан-кам ҳолларда испан ҳимоясини ёриб ўтишга уриниб кўрди.

Саутгейт Кейнни Дайер билан бирга Бускетсга босим уюштиришда ҳам синаб кўрди. Бу эса ўз мевасини берди. Гарет Саутгейтнинг мукаммал ўйин услуби Луис Энрикени мағлуб этганини бутун дунё кўрди.