Ўзбекистон ФФ ва Испания ФФ ўртасида ҳамкорлик қилиш бўйича келишувга эришилди

Аввал хабар берилганидек, Ўзбекистон Миллий олимпия қўмитаси ва Ўзбекистон футбол федерацияси президенти Умид Аҳмаджонов айни пайтда Испания пойтахти Мадрид шаҳрида бўлиб турибди.

Умид Аҳмаджонов кеча "Реал" Мадрид клуби президенти Флорентино Перес, жамоа Бош директори Хосе Анхель Санчес, клубнинг Ташқи алоқалар бўлими директори Эмильо Бутрагеньо, "Stellar group" агентлик компаниясининг Испания ва Португалия бўлими президенти Луис Алонсо билан кўришганди.

Бугун Испания футбол федерациясида учрашув бўлиб ўтди ва унда Умид Аҳмаджонов Испания ФФ Техник директори Фернандо Йерро ва Мураббийлар тайёрлаш Қўмитаси директори Эдуардо Катурла билан учрашди. Учрашув давомида Ўзбекистон Футбол федерацияси ва Испания футбол федерацияси ўртасида ҳамкорлик қилиш бўйича келишувга эришилди.

Келишувга кўра энидиликда Ўзбекистоннинг 16 ёшгача бўлган терма жамоалари Испаниядаги очиқ чемпионатларда иштирок этади. Шунингдек, Суперлига клублари вакиллари Испаниянинг “Реал” Мадрид, “Барселона” каби кучли жамоаларига сафар уюштириб, бу клубларнинг иш олиб бориш тизими, инфратузилмаси, машғулотлар олиб бориш жараёнлари билан яқиндан танишади.

Испания ФФнинг фаолиятини яқиндан ўрганиш мақсадида шу йилнинг март ойида Ўзбекистон футбол федерацияси делегациясини Испанияга юбориш бўйича ҳам келишувга эришилди.  Шунингдек, Испания ФФдан ҳам делегация юртимизга ташриф буюради. Улар томонидан ажратилган Техник директор юртимизда бўлиб, ўзбек футболини ривождантиришнинг янги тизимини йўлга қўйишга ёрдам беради.

Эндиликда Ўзбекистон футбол федерацияси ҳам Испания футбол федерациясидаги тизим асосида иш олиб боради. Ҳаттоки, ЎФФдаги штат бирликларини ҳам Испания ФФдаги билан бир хил асосда ташкил этиш режалаштирилган.

Бугун Умид Аҳмаджонов “Реал Мадрид” академияси президенти Хулио Ронко билан ҳам учрашиши кўзда тутилган.