Рўзиқул Бердиев: Футболчиларимизнинг ўйинларидан мамнунман

 

Олий Лига 30-туридан ўрин олган “Навбаҳор” – “Насаф” (1:0) учрашувидан кейин бўлиб ўтган матбуот анжуманининг дастлабки қисмида қаршиликлар устози Рўзиқул Бердиев ўз фикрлари билан ўртоқлашди.

"Ўйин курашларга бой тарзда ўтди. Бугун шундай ўйин бўлиши олдиндан маълум эди. Биз кўпроқ қарши ҳужумларда ҳаракат қилдик ва гол уриш учун вазиятларга ҳам эга бўлдик. Лекин ўйинчиларимизда гол уришга совуққонлик етишмади. Ўйинчиларимизга кўрсатма берганимизда, “Навбаҳор” жамоаси стандарт вазиятлардан кўпроқ фойдаланишини уқтирган эдик. Ўйин охирида шундай вазиятда гол ўтказиб юбордик. Агар бугунги ўйинда майдонга тушган таркибимизга эътибор берсак, бугун майдонга тушган футболчиларимиз яхши ўйин кўсатишди, шахсан ўзим бундан қониқиш ҳосил қилдим. Улар ижобий натижа учун бор кучларини бериб ўйнашди.

Режаларимиз? Биз ҳозир ОЧЛ-2018 қуръасини кутаяпмиз, шундан сўнг янги мавсум тайёргарлиги режасига аниқлик киритамиз. Ҳозирча шуниси маълумки, декабр ойининг ўрталарида йиғинни бошлаймиз. Албатта таркибимизда ўзгаришлар ҳам бўлади. Бу табиий ҳол. Ҳозирча бу ҳақда аниқ маълумот бера олмайман. Бизга яхши ўйинчилар керак, агар ОЧЛда қатнашадиган бўлсак, таркибимизни янада кучайтиришимизга тўғри келади. Бизга иккита бир хил таркиб керак бўлди.

Бу йилги футбол мавсумида жамоамиз таркибида ўйнаган барча футболчиларимиздан мамнунман, бу йил биз уларнинг иштирокида яхши натижани қўлга кирита олдик.

Бу йилги чемпионат ҳар қачонгидан яхшироқ ўтди. Ўйлайманки, бўлиб ўтган ва бугунгидек учрашувлар мухлисларимиз учун худди байрамдек, мана шундай учрашувлар кўпроқ бўлишини тарафдориман. Қанчалик чемпионатимизда курашларга бой учрашувлар кўпайса, бу мухлислар учун ҳам, футболчиларимиз учун ҳам фойдали", - деб Бердиевнинг сўзларидан иқтибос келтиради "Насаф" матбуот хизмати. 

Фикрлар

Фикр қолдириш учун авторизациядан ўтинг!