Шавкат Мирзиёев: Футбол коррупциясиз, адолат билан қандай натижага эришиш мумкинлигини кўрсатиб берди

Хабарингиз бор ўтган ҳафта сўнггида Ўзбекистон олимпия терма жамоаси Хитойда бўлиб ўтган U-23 Осиё чемпионатида ғалаба қозонди.

Ўзбекистон Республикаси Президенти Шавкат Мирзиёев 28 январь куни Қашқадарё вилоятига ташрифи чоғида вилоят фаоллари иштирокида ўтказган йиғилишида Осиё чемпионатида иштирок этган ва чемпион бўлган Ўзбекистон ёшлар терма жамоаси (U23) ҳақида ўз фикрларини билдириб ўтди. Юртбошимиз Вьетнамга қарши бўлиб ўтган финал ўйинини томоша қилгани ҳақида ҳам айтиб берди.

"Футбол коррупциясиз, адолат билан қандай натижага эришиш мумкинлигини кўрсатиб берди.

Осиё чемпионатида қатнашган терма жамоадаги болалар жайдари болалар. Бирортасининг ортида таниши йўқ. Улар миллий терма жамоанинг ўзаги бўлади.

Жанубий Кореяни ютишганида, президенти телефон қилиб табриклади.

Вьетнамга қарши ўйинни юрагимиз орзиқиб томоша қилдик. Улар ватан учун майдонда жанг қилишди. Вьетнам менсимайдиган рақиб эмасди. Улар ҳам ҳозир анча ривожланган.

Энди футболга ўзим қарайман", - дея гапирган Шавкат Мирзиёев.