«Сити» – «Ливерпуль» ёxуд «титанлар жанги» (Эркинжон Ғайбуллаев блоги)

Амалдаги чемпион чемпионликка даъвогарга қарши, Гвардиола Клоппга қарши, энг яхши ҳужум энг яхши ҳимояга, «кўклар» «қизиллар»га қарши, пул интизомга, тўпга эгалик қилувчи тизим қарши-ҳужумга асосланган тизимга қарши «жанг қилади». Умуман айтганда бизни ажойиб ўйин кутмоқда.

«Шаҳарликлар» бир ой аввал ҳам турнир пешқадами эди. Бироқ декабрь уларга оғир келди ва «Ливерпуль» катта саҳнага чиқиб олди. Айни вақтда улар энг яқин таъқибчисидан нақ етти очкога илгарилаб кетган. Мерсисайдликлар ҳозир катта кучга айланиб бормоқда ва нақ 30 йиллик совринсиз мавсумига нуқта қўйиш учун тарихий мавсумга тайёрланмоқда.

Аммо клуб чемпионликни қўлга киритиш учун ғалабани қандай қилиб ушлаб қолиши керак? «Сити» эса Клопп шогирдларини енгиш учун нималар қилиши зарур? Қуйида ана шу саволларга жавоб излаб кўрамиз.

«Этиҳад»да қандай қилиб «Сити»ни ютиш мумкин?

Фақатгина икки жамоа «Манчестер Сити»ни ўз майдонида таслим қилишнинг уддасидан чиқди. Булар «Лион» ва «Кристал Пэлас»! Ўтган мавсумдагидан биттага кам. Лекин ҳозир мавсумнинг эндигина биринчи давраси тугаган ва ҳали олдинда узоқ муддат бор. «Ливерпуль» ўтган мавсумда «шаҳарликлар»ни ўз уйида енгган жамоалардан бири. Бироқ бу ҳолат Чемпионлар Лигасининг жавоб ўйинида содир бўлганди. Чемпионат доирасида эса «Ливерпуль» Гвардиола келмасидан олдин ҳам юта олмаган.

Бу сафар «қизиллар» «Этиҳад» деб аталмиш «қўрғон»ни бузишнинг уддасидан чиқа оладими?

Жавоб ҳа. Агарда «Сити» ўз уйида ютқазган икки учрашувдаги голларнинг дастлабкисига аҳамият берсак, «кўклар» чапдан-ўнг қанотга ўтказилган узатмадан кейин гол ўтказиб юборганига гувоҳ бўламиз. Максвелл Корненинг голи Набиль Фекирнинг ўнг қанотдан юриши ва кейин чап қанотга тўп етказиб берилиши ортидан содир бўлган. Жеффрининг голи ҳам ҳудди шу тарзда рўй берди.

Аммо бу доим мағлубиятларга олиб келади дегани эмас. «Манчестер Сити» «Ньюкасль»ни 2-1 га ютган ўйинда ҳам “қарғалар” ҳудди шу услубда гол уришнинг уддасидан чиққанди.

Бу вазиятларнинг асосий қурбони Кайл Уолкер бўлган. Англиялик футболчи ўтган мавсумни аъло даражада ўтказганига қарамай янги мавсумда рақибнинг босимини қайтаришда сусткашликка йўл қўймоқда.

У вингерларга яқин ўйнамаётгани сабаб ҳимоядаги ишини муносиб тарзда бажара олмаяпти.

«Ливерпуль» учун гол уришнинг ягона йўли бу Уолкерга ҳужум қилиш. Садио Мане ва Робертсонларнинг борлиги сабаб Клопп шогирдлари бу вазифани уддалаши мумкин. Салоҳнинг ҳам тўп билан кўпроқ бу қанотда ўйнаётгани меҳмонларнинг имкониятларини кескин ошириб юборади.

«Ливерпуль»га қандай қилиб гол уриш мумкин?

«Ливерпуль» бу мавсумда атиги 8 гол ўтказиб юборган. Ўз уйида бирорта клуб уларга биттадан кўп гол урмаган. Европа яшил майдонларида буни бажаришнинг иложи бўлмасада, ички чемпионатда Клопп шогирдларига тенгсиз келадигани йўқ.

Чемпионлар Лигасида улар тезкор ҳужум уюштиришнинг ортидан голлар ўтказиб юбораётган бўлса, Премьер Лигада нимани кўришимиз мумкин? Клуб ўтказиб юборган голларнинг ярми қуйидан ўйнаш ортидан киритилмоқда. Геззал, Патерсон, Лингард ва Мейтланд-Найлз ҳудди шу тарзда гол уришди.

Ҳаводаги курашда Виргиль Ван Дэйкни доғда қолдириш имконсиз. У ҳар қандай ишни уддасидан чиқади. Аммо ердан ўйнашга келганда голландиялик футболчини ҳам алдаб ўтиш мумкин.

Чемпионлар Лигасида «Наполи» ва «ПСЖ» бу ишни бошлаб берди. «Ливерпуль»га қанотлардан тезкор ҳужум қилиб, ҳимоячиларга юзланиш ва ердан ўйин таклиф қилиш нафақат ҳимоячиларни балки Алиссонни ҳам саросимага тушишига олиб келмоқда.

Алиссон ўтказиб юборилган баъзи голларда тўлиқ айбдор. У Кариуснинг анча яхшиланган варианти бўлмоқда. Айниқса қисқа соч турмаги ва соқолини айтганда. У жамоасининг энг яхши ҳимоя чизиғига эгалиги туфайли яхшироқ кўринмоқда. Бироқ у дунёнинг энг яхши дарвозабони бўлишга лойиқ ўйин кўрсатмаяпти.

«Манчестер Сити» тезкор ҳужум ташкил қилиб ерлатиб ўйнаган тақдирда ўз мақсадига эриша олади. Буни бажарадиган Менди, Сане ва Стэрлинглар бор. Аммо буни амалда бажариш керак. Қанчалик ўхшашини эса вақт кўрсатади.