Александр Гейнрих билан тўп сурган таэквондочимиз
Ads

Жасур Бойқўзиев ўзбек таэквондо WTF оламида ўзига хос тарих яратган спортчилардан саналади. Фаолияти давомида кўплаб совринларни қўлга кирита олган. Ҳозирда, кадетлар терма жамоасида ёрдамчи мураббий сифатида фаолият юритмоқда. Қолаверса, хали спортчилик фаолиятини ҳам якунлаш ниятида эмас. 

Биз ушбу спортчимиз билан бироз сухбат қурдик. Қуйида, уни эътиборингизга хавола этамиз...

Sports.uz маълумотномаси

Жасур Бойқўзиев 1986 йил 4 сентябрда Тошкент вилояти Ангрен шаҳрида таваллуд топган. Таэквондо WTF бўйича 10 карра Ўзбекистон чемпиони, Осиё чемпиони, Осиё ўйинлари ғолиби, Жаҳон чемпионати совриндори, Гран При турнирлари ғолиби ва совриндори, Ўзбекистонда хизмат кўрсатган спортчи.

photo_2019-07-19_18-10-49

 - Жасур мураббийликка жиддий киришганингизга қараганда, спортчилик фаолиятингизни расман якунлаганга ўхшайсиз?

- Биласизми, умуман олганда хали спортчилик фаолиятимни тўлиқ тугатганим йўқ. Шунчаки, айрим сабабларга кўра мусобақаларда иштирок эта олмаяпман. Лекин яна даянга чиқиб, юртимиз шаънини муносиб ҳимоя қилиш истагидаман.

- Спортчилик ҳамда мураббийлик фаолиятини бир вақтда олиб бориш қийинчилик туғдирмайдими?

- Балки ўзига хос ноқулайлик туғдириши мумкиндир. Лекин барчасини уддаласа бўлади.

photo_2019-08-12_14-53-29

- Айтингчи, мураббийлик маъсулияти қандай экан?

- Спортчилик фаолиятимда мураббийларга қанчалик қийинлигини билмас эдим. Буни энди хис қилмоқдаман.  Сабаби, спортчи фақат ўзи учун ҳаракат қилади. Мураббий эса ҳамма шогирдлари учун жон куйдиради.

- Куни кеча пойтахтимизда кадетлар ўртасида жаҳон чемпионати якунланди. Умуман шогирдларингиз натижасидан қониқиш хосил қилдингизми?

- Албатта, кўнглимиз тўлди. Чунки, хали Ўзбекистон Таэквондо WTF тарихида кадетлар ўртасида жаҳон чемпиони бўлмаган эди. Бу натижани ҳам қўлга кирита олдик. Бу биз учун муваффақиятларнинг бошланиши деб биламан. Насиб қилса, янада яхши натижаларни кўрсатиб, бизга ишонч билдирганларни ишончини оқлашга ҳаракат қиламиз.

photo_2019-08-08_22-55-40

-  Адашмасам, бу  Ўзбекистон WTF Асоциацияси ташкил қилган энг юқори савиядаги турнир бўлди?

- Шубхасиз, бундай тадбир хали бўлмаган эди деб бемалол айта оламан. Ташкилотчилик жуда юқори бўлди. Бунга ташриф буюрган мехмонларнинг фикрларидан ҳам билса бўларди. Асоциация рахбарияти барча қулайликларни яратиб берди. Бир сўз билан айтганда юртимизга ташриф буюрган барча делегация аъзоларида мазкур жаҳон чемпионати катта таассурот қолдирди десам янглишмаган бўламан. Қолаверса, Бутунжаҳон Таэквондо WTF тарихида энг катта “Fleshmob” ўтказилди. Бу эса юртимизда ушбу спорт турини янада ривожланишига, ёшларнинг қизиқишига сабаб бўлади деб ўйлайман.

- Янги рахбарият ўз олдига қандай юксак мақсадлар қўйган?

- Бу борада узоқ гапириш мумкин. Албатта юксак марраларни забт этишни мақсад қилишган. Рахбаримиз, Шерзод Рихсибоевич Тошматовни бокс федерациясидаги фаолияти орқали барча яхши танийди. У ерда эришган муваффақиятларидан ҳам барча хабардор. Ўз ишининг устаси. Шундай экан, Таэквондо WTFда ҳам юқори чўққиларни забт эта олишимизга ишонамиз.

photo_2019-08-13_22-25-17

 - Ўзбек таэквондо тарихида 87 кг вазн тоифасида ҳар доим кучли спортчилар бўлган. Жумладан, Акмал Эргашев, Сиз, Дмитрий Шокин ҳозирда ушбу вазнда иқтидорли спортчилардан кимни алоҳида айтиб ўтган бўлардингиз?

- Шоҳрух Ражабов ажойиб имкониятга эга.

-  Осиё чемпионати, Осиё ўйинларида ғолиб, бўлгансиз. Жаҳон чемпионати шохсупасининг юқори поғонасини забт этишга нима халақит берган?

- Шунчаки омад етишмаган деб айта оламан. Ўша жаҳон чемпионатида азалий рақибим Радик Исаевга 5:4 ҳисобида имкониятни бой бергандим. Бироз жанг назоратини йўқотганим панд берганди.

photo_2019-08-13_22-32-26

- Озарбайжонлик Радик Исаев фаолиятингиз мобайнида энг ноқулай рақиб бўлган эдими?

- Қайсидир маънода жуда ноқулайлик туғдирган. Ўз ўрнида мен ҳам унинг учун  шундай саналар эдим. Чунки, Радик билан умумий хисоб 2-2 кўриниш олган. Балким яна рўбарў келиб қолсак умумий ҳисобни ўзим томонга оғдираман. Ноқулайлик жиҳати унинг бўйи анча баланд эди. Адашмасам, икки метрдан ошарди. Меники эса, 184 см. ????????????

- Олимпиадага бора олмаганлигингиз сиз учун энг катта армон бўлса керак?

- Тўғри, ҳар бир спортчининг олий мақсади Олимпиада ҳисобланади. Менга эса, бу тўрт йилликнинг энг мухим мусобақасида иштирок этиш насиб қилмаган. Лекин Олимпиададан ташқари барча мусобақаларда ғолиб ва совриндор бўлганман. Бу эса фахрланишга арзигулик натижа деб ўйлайман. 2015 йил жаҳон рейтингида биринчи ўринда бўлганимнинг ўзи, Олимпиадада иштирок этиш билан баробар деб ҳисобайман. ????????????

photo_2019-08-13_22-32-42

- Келинг бироз ёшликка қайтамиз. Болаликда футбол билан шуғулланганингиз ҳақида интервьюларингизда айтиб ўтган эдингиз. Нима учун, давом эттирмагансиз?

- Футболни жуда ҳам яхши кўраман. Фақат бу спорт тури жамоавий бўлганлиги боис, яккакураш турини танлашга тўғри келган. Сабаби, жамоавий спорт тури бироз қийин саналади. Сиз кучли бўла туриб, жамоадошларингизни савияси бироз пастроқ бўлса, жамоангиз кучлилар қаторидан ўрин ололмайди. Мен эса доим кучлилар қаторида бўлишни хохлаганман.

- Мавзуни давом эттирган холда, шуни айтиш мумкинки, сиз Ангрен шаҳрида таваллуд топгансиз. У ерда ўзбек футболида ўзига хос из қолдирган Александр Гейнрих, Ильяс Зейтуллаев каби футболчилар тарбия топган. Улар билан шахсан танишмисиз?

- Албатта, улар ҳақида кўп эшитганман. Ўз ўрнида мухлислик қилганмиз. Гейнрих билан бир-икки марта футбол ўйнаганимизни айтмасам, шахсан таниш эмасман.

photo_2019-08-03_15-27-49

- - Умуман олганда бошқа спорт турларидаги қайси юлдузларимиз билан яқин, дўстона муносабатга эгасиз?

- Одатда, боксчиларимиз билан кўп гаплашиб тураман. Исроил Мадримов, Бектемир Мелиқўзиев, Хуршид Тожибоевларни айтиб ўтишим мумкин. Умуман олганда бошқа боксчилармиз билан ҳам илиқ муносабатдаман. 

- Юқорида таъкидлаб ўтганимиздек, сиздан аввал 87 кг вазнда Акмал Эргашев юртимиз шаънини ҳмоя қиларди. У билан даянда дуч келганмисиз?

-   Дуч келганмиз. Яъни қайси маънода спарринг жангларида иштирок этганмиз. Лекин расмий мусобақаларда тўқнаш келмаганмиз.

- Пойтахтимизда бўлиб ўтган Осиё чемпионати финалида эронлик Юсуф Карами билан дуч келгансиз. У Бутунжаҳон таэквондо оламида ўз ўрнига эга эди. Лекин уни осонлик билан таслим қилдиз. Бунга қандай  эриша олгансиз?

- Бу жанг бир умр ёдимдан чиқмаса керак. Таъкидлаб ўтганиз каби,  Юсуф Карами жаҳон таэквондо оламида ўзига хос спортчи ҳисобланарди. У одатда нокаутчи бўлган. Жангларининг аксариятида нокаут билан ғалаба қозонар эди. Тўғриси, ўша жангда мен ҳам шундай холатга тушиб қолишдан қўрққанман. Лекин бахсни тўлиқ назорат қилганман ва уни осонликча мағлуб этгандим. Қолаверса, мухлислар далдаси ҳам мухим роль ўйнаган.

photo_2019-08-13_22-32-46

- Юртимизда жанговар фильмлар суръатга олиш урфга айланиб бормоқда. Бу борада баъзи спортчиларимизнинг ҳам иштирокини кузатишимиз мумкин. Таклиф бўлса, қандай йўл тутардингиз?

- Таклиф бўлса, ўйлаб кўришим мумкин!  ????????

- Одатда, ММА йўналишида таэквондо  усталарини кам учратамиз. Аслида, бундай жангларда таэквондочилар муваффақият қозонишга қодирми?

- Албатта, чунки таэквондочиларнинг оёқ зарбалари жуда кучли ҳисобланади. Агар биринчи бўлиб, шундай зарбасини ўтказа олса, муваффақиятларга бемалол эриша оладилар.

photo_2019-08-13_22-30-47

- Умуман олганда таэквондо оламида кимга хавас қилардингиз?

- Биласизми, фаолиятим давомида кўплаб Олимпия ўйинлари ғолиби ва совриндорлари билан учрашиб, уларни мағлубиятга учратишга ҳам муваффақ бўлганман. Лекин таэквондо оламида энг юқори натижаларни қайд этган АҚШлик Стивен Лопесга қойил қолардим.

- Яна Тошкентда бўлиб ўтган, Осиё чемпионатига қайтсак, ўша терма жамоа таркибида Сиз, Шокин, ака-ука Рафаловичлар ва Умида Абдуллаева ҳам бор эди. Негадир охирги вақтда Умида камнамо бўлиб қолди. Балки бундан сизнинг яъни ўша вақтдаги терма жамоа сардорининг хабари бордир?

- Умида Абдуллаева спортчилик фаолиятини якунлаганига бир йилдан ошди. Сабаби борасида эса бирор маълумотга эга эмасман.

photo_2019-08-06_22-30-40

- Ҳозирда, қайси нуфузли мусобақада спортчи сифатида иштирок этишн кўзлаб турибсиз?

- 2020 йилги Осиё чемпионатида иштирок этиш истагим бор.

- Фаолиятингизни шундай юқори нотада яунлаган яхши эмасми?

- Тўғрикуя, лекин профессионал бўлганингиздан кейин спортни тарк этиш жуда ҳам қийин бўлар экан.

-  Умуман олганда мазмунли сухбатингиз учун рахмат. Ўз ўрнида мураббий ва спортчи сифатида барча режаларингиз амалга ошишини тилаб қоламиз!

- Рахмат.

Аҳмадбек ЭШМАТОВ сухбатлашди.

photo_2019-08-13_22-32-49