Анчелотти “Реал”нинг шармандали мағлубияти сабабини айтди

Испания чемпионатининг 11-турида “Реал” футболчилари ашаддий рақиб – “Барселона”ни қабул қилиб, йирик ҳисобда аламли мағлубиятга учради.

Каталонияликлар иккинчи бўлимда тўртта тўп киритиб, 4:0 ҳисобида зафар қучди ва мадридликлар билан очколар ўртасидаги фарқни олтитага етказиб олди.

Баҳсдан кейин Карло Анчелотти қақшатқич мағлубият сабабини айтди.

- Бугун кўп энергия сарф қилинди. Муаммо шундаки, кетма-кет иккита гол ўтказиб юборганингдан кейин таваккалга қўл урасан.

Айниқса, жуда зўр ўйнаётган жамоага қарши таваккал қилиш ўта хавфли. Агар бир битта ёки иккита тўп кирита олганимизда ҳаммаси бошқача бўларди.

Ҳал қилишимиз зарур бўлган муаммолар бор. Беллашувнинг биринчи бўлимида интенсивлигимиз юқори бўлди. Иккинчи бўлимни ҳам яхши бошладик. Лекин гол ҳаммасини ўзгартириб юборди. Бу кўпроқ психологик муаммо, тактик хато эмас, - деди Карло Анчелотти.