Андижонлик ёшлар Германия ва Испанияда малака оширадилар

Андижондаги футбол академияси охирги пайтларда кўпчиликнинг эътиборида бўлиб турибди. Айниқса, бу  йил илк бор академия қошида «Андижон-2» жамоаси ташкил қилиниб, про-лига «В» гуруҳида иштирок этаётгани ижобий ҳолатлардан биридир. Қолаверса, академия тарбияланувчилари халқаро турнирларда ҳам ғолибликни қўлга киритиб келмоқда. Ёшлар билан ишлашда тажриба тўплаб, мухлисларнинг эътиборига тушиб келаётган Шохруҳ Ишановнинг академияда ёшларни тарбиялашда қўшаётган ҳиссаси жуда катта.  

- Про-лигада «Андижон-2» жамоасини ташкил этишимизнинг асосий мақсади аввало Суперлигадаги «Андижон» жамоасига муносиб ёшларни етиштириб беришдан иборат. Қолаверса, болалар ва ўсмирлар ҳудудий академиялари ўртасида ушбу жамоанинг ташкил этилгани ҳам жуда яхши бўлди. Энди академиямизда таҳсил олаётган 160 нафарга яқин болада ҳам «Андижон-2»да тўп суриб ўзимизни кўрсатиш имконияти бор деган мақсад ҳам пайдо бўлди. Бу академиямизнинг 10-синфида ўқиётган болалардан иборат бўлган жамоадир. Фақат бир-иккита 11 синф ўқувчилари қўшилишган холос. Ёшларимиз эса бу орқали катта футболга биринчи қадамларини ташлашди. Қолаверса, вилоят ҳокими жамоамизга ҳомийларни ҳам бириктириб берган. «Ширингаз» корхонаси раҳбари Раҳимов Зафархўжа Акрамхўжаевич академиямизнинг нафақат ушбу жамоасига, балки қолган ёшдаги жамоаларга ҳам катта эътибор қаратяпти. Қолаверса, академиямиз раҳбари Насибулло Мадраҳимов билан вилоят футбол ассоциациясининг вице-президенти Бекзод Каримов Зафархўжа Раҳимов билан ҳамкорликда иш олиб бораётгани ҳам биз учун самарали бўляпти. Биз дастлабки икки йилда ёшларимиз учун про-лигада амалиётни оширишни мақсад қилганмиз. Шундан кейин про-лиганинг «А» гуруҳига чиқишни режалаштиганмиз. Узоғи билан 3-4 йил ичида ушбу футболчиларимизни Суперлигада кўришни ҳам умид қилиб турибмиз, - дейди Ишанов.

Шохруҳ Ишанов мураббий сифатида тажрибасини янада ошириш йўлларини ҳам излаб топишга уринган ҳолда доим ўрганишдан зерикмайди.

- Про-лигада ишлаётган мураббийлар барибир катта футболни кўрган мутахассислар ҳисобланишади, - дея мавзуни давом эттирди, мураббий. - Биз эса болалар футболидан чиққанмиз. Аммо биз суюнадиган ва ёрдам бераётган мутахассислар футболимизда катта тажрибага эга бўлишган. Биз улар билан доим маслаҳатлашамиз. Ўсишни истаган мураббий изланади. Мен мураббийликни танлаганимдан бери изланиб келаман. Вадим Шодиматов, Усмон Тошев, Ислом Аҳмедов, Рауф Инилеев каби устоз мураббийлардан кўп нарсаларни ўрганаман. Қолаверса, яқинда оламдан ўтган Язгелди Қутданов ҳам биз учун чинакам устоз мураббий эди. Ҳеч қачон улардан бирор нимани сўрашдан уялмайман. Ҳаттоки, кечаси бўлса ҳам уларга қўнғироқ қилиб, ўзимни қизиқтирган мураббийлик масалалари бўйича фикрларини ўрганаман. Агар уятсангиз, ҳижолат бўлиб юраверсангиз бу сизнинг зарарингизга ишлаши мумкин. Кўпчилик интернет орқали Гвардиола, Моуриньо, Сарри каби таниқли мутахассисларнинг иш услубларини ўрганиш ва уларга ўхшашни исташади. Аммо улар каби бўлиш учун ўша мураббий билан бизнинг миямиз тўғри келмайди. Чунки миясида ўйлаганини фақат ўзи билади. Бир-иккита машғулотини кўриб эса хулоса чиқариб бўлмайди. Барибир ҳар бир мутахассиснинг сири бўлади. Ўтган йили Москвага бориб, «Спартак», ЦСКА, «Химки», «Краснодар» клубларининг академияларига бордим. Уларнинг ишлаш тажрибаларини, машғулотларини кўрдим. 2005 йилда туғилган футболчиларнинг мураббийлари билан мулоқот қилдим. Бизни хурсанд қилгани шуки, уларда ўзбек футболининг ёшлари ҳақидаги таассуротлари катта.

Олдин ўзининг футбол мактабида тарбияланган бола кейинчалик бошқа жойдаги билим даргоҳларига кетиб қолиш ҳолатлари кўп кузатиларди. Аммо энди бундай вазиятларга барҳам берилди.

- Олдинги тарбияланувчиларимиз 9-синфни ўқиб, кейинги интилишлари Тошкентга бўлиб қолганди. Энди эса вазият ўзгарди. Ўзбекистон футбол ассоциациясининг биринчи вице-президенти Умид Аҳмаджонов шундай тизим яратдики, 14 та ҳудудий академиялар ўз тарбияланувчилари билан шартнома имзолади. Натижада бола ҳеч қаерга кетмайди ва у академиянинг ўз тасарруфида қолади. Бу ердан кетмоқчи бўлган бола эса фақатгина Тошкентдаги Республика марказий академияга кетади.

Бу йилдан бошлаб ҳудудий футбол академиялари иштирокида Республика чемпионати ҳам йўлга қўйилди. Бу эса ўсиб келаётган ёшлар учун жуда яхши амалиёт вазифасини бажариши шубҳасиз.

- Ҳудудий академиялар ўртасида ташкил этилган уй ва сафар тизимидаги мусобақани биз 6-7 йилдан бери орзу қилиб келаётгандик. Илгари бундай турнирлар битта ҳудудга қамраб олинарди. Ўтган йили академиялар ўртасидаги мусобақада биз 2005 йилда туғилган футболчилар ўртасида чемпион бўлдик. Ҳозирги пайтда ҳам U-14 жамоамиз ҳудудий академиялар мусобақасида биринчи ўринда бормоқда. Биз болаларга ҳеч қачон натижани устун қўймаймиз. Аммо уларнинг ўзларида натижа кўрсатиш иштиёқи кучайиб боряпти. Чунки машғулотлардан ва ўртоқлик учрашувларидан келиб чиққан ҳолда ўйинчиларимизда бирор нимага эришиш учун шижоатлари кучайиб боряпти. Биз эса уларга фақат тўғри кўрсатма ва йўналишларни берамиз. Ғалаба эса ўзидан-ўзи келиб чиқаверади. Агар майдонда шогирдларингиз хато қилса, бу аввало мураббийнинг хатоси бўлади. Ҳар ҳолда мен шундай тушунаман. Демак, мураббий шогирдларидан машғулотда ўша нарсани етарлича талаб қилмаган. Ҳар бир боланинг нотўғри тўп узатиши, нотўғри фикрлаши, бу мураббийнинг камчилиги ҳисобланади, - дея муносабат билдирди, - Ишанов.

Эътиборлиси, Ишанов бошчилигидаги тарбияланувчилар турли мамлакатлардаги халқаро мусобақаларда иштирок этиб, ғолибликни қўлга киритиб келмоқдалар. Энди эса футбол академиясининг хориж сафарлари учун географияси кенгаймоқда.

- Қозоғистоннинг Олма-Ота шаҳридаги халқаро мусобақада биринчи ўринни қўлга киритиб келганимиздан сўнг Насибилло Мадраҳимов, Бекзод Каримов ва «Ширингаз» раҳбари Зафархўжа Раҳимовнинг ташаббуслари билан яқин орада бизни ўқув-машғулот йиғинини ўтказишимиз учун Германияга жўнатишмоқда. Худо хоҳласа, 12 кунлик йиғин учун болаларимизни олиб борамиз. Бундан ташқари, Умид Аҳмаджонов академиямизга қилган ташрифи чоғида чемпионларимизни табриклаб, совғаларини топширди ва июнь ойида Испания бўладиган халқаро мусобақага бизни ёздириб қўйди. Олдиндан бизни қайноқ хориж сафарлари кутиб турибди. Барибир ёшларга халқаро тажриба ҳам керак, - деди мураббий.

Шунингдек, футбол академиясида тарбия топиб, бугунги кунда катта футболга кириб келган истеъдод эгалари ҳақида ҳам тўхталди.

- Биз академиядаги барча мураббийлар билан биргаликда ҳамжиҳат бўлиб ишлаймиз. Шу боис етишиб чиқаётган ҳар бир бола барчамизники. «Андижон» жамоасида Хушнуд Авилов, Дониёр Абдуманнопов, Усмонали Исмоналиев, Фарҳод Соҳибжонов, «Металлург»да Одил Абдумажидов ва яна айтадиган бўлсак, бундай иқтидорларимиз кўп. Агар уларни мен тарбиялаганман десам нотўғри бўлади. Чунки уларга бошқа мураббийлар ҳам сабоқ беришган. Шу боис бундай ютуқлар ҳаммамизники.