"Barselona" uni yana yo‘qotdi

"Barselona"ning urugvaylik himoyachisi Ronald Arauxo safdan chiqdi. Bu haqda klub rasmiy sayti xabar tarqatmoqda.

22 yoshli futbolchi kecha La Liganing 36-turida “Levante”ga qarshi bo‘lib o‘tgan o‘yinda jarohat olgan. U tez orada chuqurlashtirilgan tibbiy ko‘rikdan o‘tkaziladi va shundan so‘ng uning jarohati bo‘yicha aniq tashhis qo‘yiladi.

Aytish lozimki, Arauxo yaqindagina jarohatidan sog‘ayib safga qaytgan edi. U joriy mavsum 31 ta o‘yinda maydonga tushdi va o‘z hisobiga 1 ta gol hamda 2 ta golli uzatma yozdirib qo‘yishga erishdi. Uning klub bilan amaldagi shartnomasi 2023 yilga qadar imzolangan.

“Barselona” 36 turdan so‘ng La Liga musobaqa jadvalida 2-o‘rinda bormoqda.