Бахтиёр Ашурматов: "Отабек Ғуломхўжаевга кўпроқ ишонч билдирилганида...

Суперлиганинг 7-тури доирасида Андижонда бўлиб ўтган “Андижон” ҳамда “Қўқон-1912” жамоалари ўртасидаги “Водий дербиси”да меҳмонлар 1:2 ҳисобида муҳим ғалабани қўлга киритишди.

Беллашувдан кейин қўқонликлар устози Бахтиёр Ашурматов ўз фикрлари билан ўртоқлашди.

Ўйин ҳақида

- Қўқондан келган мухлисларимиз ва бизни қўллаб турган раҳбариятга миннатдорлик билдираман. Футболда шундайки, икки-учта мағлубиятдан кейин танқидлар кўпаяди. Мураббийнинг курсиси қимирлаб қолади. Шу сабабли, бугун мағлубиятга ҳаққимиз йўқ эди. Футболчилар ўйин масъулиятини тўлиқ ҳис қилишди. Фақат ғалаба учун чиққанимиз учун иккита ҳужумчи билан ўйнадик ва бу ўзини оқлади. Лекин 0:2 дан кейин ўйин услубимиз ўзини унчалик оқламади, деб ўйлайман. Дарвозамизга яқин ҳимоялана бошладик ва бундан “Андижон” фойдаланди. Агар улар пенальтидан гол урганида дуранг бўлиши ҳам мумкин эди. Ҳимояни янада мустаҳкамлаш учун бешта ўйинчи билан ўйнай бошлагандик. “Андижон” бугун ютқазганига қарамай, муносиб ўйин кўрсатди. Пенальтидан киритилмаган гол – бу футболда учрайдиган вазият. Мезбонлар сафида яхши ўйинчилар кўп. Дониёр Абдуманнопов яхши савияда ўйнади. Шунингдек, Мартин Боаке ҳам яхши ўйин кўрсатди. Охирги пайтларда у танқидларга учраганди. Умуман айтганда, майдонда муносиб ўйин бўлди. Учрашув давомида юқори муҳитни яратишгани андижонлик мухлисларга ҳам раҳмат айтаман.

Бекмуродов билан Азимов тўғрисида

- Эътибор берган бўлсангиз, бугун жамоамиз таркибида андижонлик футболчилар – Фарҳод Бекмуродов билан Сардор Азимов яхши ўйин намойиш қилди. Олдин “Андижон”да ўйнагани сабабли бундай пайтда улар собиқ клубига қарши икки карра куч билан тўп суради. Бу ўйинчиларни асосий таркибда майдонга туширишда иккиланганим йўқ. Улардан яхши ўйин кутгандим ва буни оқлашди. Бекмуродов бошқа ўйинларга нисбатан бугун яхшироқ ўйнади.

“Андижон” ҳамда Ғуломхўжаев хусусида

- Афсуски, мураббийнинг тақдири шунақа, икки-учта учрашувда ютқазса, ишдан бўшатиш ҳақида ўйлаб қолишади. Отабек Ғуломхўжаев ўтган йили “Андижон”ни қийин вазиятда Суперлигада олиб қолганди. Унга кўпроқ ишонч билдирилганида бу вазиятдан чиқиб кетиши мумкин эди. Мавсум бошидан “Андижон”нинг ўйинларини кузатяпман. Комбинацион ўйин намойиш қилишга ҳаракат қилишяпти. Футболчиларимизга “Андижон”нинг ярим ҳимояси кучли эканлигини айтгандим. Чунки Дониёр Абдуманнопов, Жасур Жалолиддинов, Муҳаммад Исаев, Камрон Саидазимов, Дониёр Исмоилов каби йигитлар жуда тезкор. Улардан биринчи бўлимда кўпроқ тажовузкор ўйин кутгандим. Лекин бизнинг жамоа биринчи бўлимда яхшироқ ўйнади. Иккинчи таймда “Андижон” кучлироқ ўйнади, айниқса, охирги 20 дақиқада.

Ўзбекистон Кубогини тарк этиши

- Ўзбекистон Кубогига келсак, биз мураккаб гуруҳга тушиб қолгандик. Таркибда ротация қилиб, ўйин амалиётига кам эга бўлаётганларга имконият бергандик. Биз мураббийлар штаби йўл қўйилган хатоларни кўриб чиқдик. Мураббийлар, журналистлар ёки мухлисларга ҳозирги кундаги ютуқлар керак. Таркибдаги ротациялар ўзини оқламади. Биринчи ўйиндаги мағлубият қимматга тушди.

Музаффар Абдуллаевнинг жароҳати

- Афсуски, Музаффар Абдуллаев жароҳат олди. Унинг соғлигидан хабар олиш учун шифокорларимиз касалхонага кетишди. Худодан тезроқ соғайишини ва жароҳати жиддий бўлмаслигини сўраб қоламиз. Тез орада унинг соғлиги ҳақида хабар берамиз. Музаффар Абдуллаев ўйин қаҳрамони бўлди. У соғлигини таваккал қилиб, жамоамизни муқаррар голдан сақлаб қолди.