Бобур Акбаров: Малайзия чемпионати Ўзбекистон чемпионатидан кучсиз эмас

Малайзия чемпионатида тўп сураётган футболчимиз Бобур Акбаров яқинда у ердаги чемпионатни якунлаб Ўзбекистонга қайтиб келди. Андижоннинг Жалақудуқ туманида истиқомат қилаётган футболчи ҳозирда ўз уйида дам олмоқда. Айтиш лозимки, Акбаров икки йилдан буён Малайзияда тўп суриб келмоқда. Ўтган йили биринчи дивизионда иштирок этган бўлса, бу йил Суперлигасида ўйнади. Эътиборлиси, ўтган йилдан бери Бобур “Куала-Лумпур” жамоаси шарафини ҳимоя қилиб келмоқда. Ҳимоячи сифатида бўйдор ва бақувват бўлган футболчи ўз ўйинлари билан малайзияликларнинг ишончини қозона олди. Шу боис у ерда Акбаровга қизиқиш катта. Ўзининг айтишича, Малайзия футболига анча мослашиб олган ўйинчи кейинги фаолиятини ҳам яна ўша ерда давом эттириш истагида.

- Мавсумни кўтаринки руҳда ўтказдик. Бу йил Малайзия Суперлигасида дебютант эдик ва шу боис таркибдаги кўп футболчилар у ерда илк бор тўп суришди. Ростини айтсам, бизда Суперлигада қатнашиш борасида ўйин амалиётимиз камлиги боис кўп учрашувларда ютқазиб қўйдик. Тўғри, вақти келиб ўзимизга керакли очколарни йиғдик. Якунда эса мавсумни 10-ўринда якунладик. Бир сўз билан айтганда, жамоамиз янги эди ва Суперлигада биринчи бор қатнашгани боис совринли ўринлар учун кураша олмадик. Шахсан ўзимга келсак, қизил ва сариқ карточкаларни ҳисобга олмаганда, деярли барча учрашувларда ўйнадим. Насиб қилса, кейинги фаолиятимни яна Малайзияда давом эттираман, - дейди футболчи.

Акбаров фаолиятининг учинчи йилини ҳам яна Малайзияда ўтказишга тараддуд кўрмоқда. Юқорида таъкидлаб ўтганимиздек, унинг “Куала-Лумпур”даги ўйинлари орқали маҳаллий мутахассис ҳамда мухлисларнинг эътиборини қозона олди. Лекин футболчининг гапига эътибор қаратсак, у кейинги фаолиятини яна Малайзияда давом эттираман деяпти, бу вазиятда Бобур “Куала-Лумпур” жамоасининг номини тилга олгани йўқ. Биз эса унга клуб билан шартномани узайтирмайсизми, дея сўраганимизда шундай деди:

- “Куала-Лумпур” билан ўртамизда тузилган шартнома ниҳоясига етди. Аммо янги шартнома имзолаганимиз йўқ. Тўғрисини айтадиган бўлсам, клуб билан янги шартнома борасида келиша олмай қолдик. Шунинг учун янги мавсумда энди бошқа жамоа шарафини ҳимоя қиламан. Ҳозирча олдимда бир қатор вариантлар турибди. Бу борада агентлар ишлашяпти. Ҳайриятки, мен учун яхши таклифлар бор.

“Куала-Лумпур” Бобур Акбаровнинг Малайзиядаги дастлабки жамоаси бўлиб қолади. Икки йил давомида футболчимиз мазкур клуб шарафини муносиб даражада ҳимоя қила олди. Ўтган йили биринчи дивизионда муваффақиятли қатнашиб Суперлигага йўл олишида ҳам ўзбекистонлик ўйинчининг ҳиссаси катта бўлганди. Эндиликда ушбу жамоа Акбаров учун ўтмишга айланди. Ўз навбатида Бобур у ердаги икки йиллик фаолияти давомида нималарни ўргангани ҳақида гапирди.

- Икки йил давомида иккита мураббий қўли остида ўйнадик. Иккаласи ҳам бразилиялик мутахассислар эди. Бунинг натижасида жамоамизда уч нафар бразилиялик футболчилар тўп суришди. Дарвоқе, аргентиналик легионер ҳам бор эди. Малайзияда кўплаб дўстлар орттирдим. Йиллар давомида футболчиликдаги камчиликларимни бартараф этиб боряпман. Мураббий бошчилигида ўзимга бўлган ишонч кучайди.

Андижонда бўлиб турган футболчини яна Ўзбекистон чемпионатига қайтишини кутаётганлар ҳам йўқ эмас. Лекин ҳозир бунинг мавриди эмаслигини Акбаров яна бир бор айтиб ўтди.

- Боя айтганимдек, ҳозир бошқа клублар билан музокаралар бўляпти. Агар ижобий ҳал бўладиган бўлса, яна Малайзия чемпионатида ўйнайман. Мабодо, музокаралар ўхшамаса, ўзимиздан ҳам таклифлар бўляпти. Очиғи, бу масала бўйича ҳали аниқ бир тўхтамга келмадим.

Бобур Акбаровнинг Бахтиёр Ашурматов билан муносабатлари жуда яхши эканлигини кўпчилик билса керак. Бугунги кунда ОКМК жамоасини бошқараётган мураббий келаси йили Осиё Чемпионлар лигасининг плей-офф босқичида иштирок этади ва унда муваффақиятли қатнашиш учун таркибни кучайтирмоқчи. Айниқса, ҳимоя чизиғини мустаҳкамлаш учун Бобур Акбаров билан яна ҳамкорлик қилиш таклифини ўртага ташлагани ҳақидаги маълумотларга ойдинлик киритиш илинжида яна Акбаровга юзландик.

- Бахтиёр ака билан гаплашиб турамиз. Лекин ўртамизда ҳозирча клуб ва фаолият борасида ҳеч қандай гап-сўз бўлгани йўқ. Суперлигамиз расман тугаганидан кейингина бошқа масалалар ҳақида гаплашсак бўлади. ОКМК жамоасида ўйнайманми-йўқми, буни Худо билади. Бахтиёр Ашурматов жамоасига омад тилаб қоламан. Осиё Чемпионлар лигаси мусобақасида иложи борича узоқроққа боришининг тилакдошиман.

Шу билан бирга Бобур Акбаров Малайзия футболининг бугунги куни ҳақида гапирар экан, жумладан шундай деди:

- Агарда малайзияликлар билан музокаралар ижобий якунланса, декабрь ойидаёқ яна кетишим мумкин. Биласизми, у ерда легионерларнинг ҳисобига йилдан-йилга Малайзия футболи кучайиб боряпти. Клублар асосан ўз сафларига яхши савиядаги легионерларни жалб қилишяпти. Ҳар бир жамоада энг камида тўрт нафардан хорижлик ўйинчилар тўп суришади. Шу ўринда айтмоқчиманки, кўпчилик Малайзия футболини Ўзбекистонникидан кучсиз деб ҳисоблашади. Лекин мен бу фикрга қўшилмаган бўлардим. У ерда икки йил давомида тўп суриб шуни биляпманки, Малайзия футболининг ўзимизникидан кучсиз томонлари йўқ. Ҳозир айтганимдек, у ерда футбол ривожланиб боряпти. Футбол учун яратилаётган шарт-шароитлари борасида гап бўлиши мумкин эмас. Мен бу борада уларга қойил қолганман.

Шуҳратбек Жўраев суҳбатлашди.

Фикрлар

Фикр қолдириш учун авторизациядан ўтинг!