Бокс бўйича икки карра Олимпиада чемпионларини биласизми?

Барча спортчиларнинг энг катта орзуси шубҳасиз тўрт йилликнинг энг нуфузли турнири ҳисобланувчи Олимпиадада ғалаба қозониш саналади. Жаҳон бўйлаб кўплаб спортчилар бундай муваффақиятга эриша олганлар. Баъзилар бир неча маротаба ҳам бундай ғалаба нашидасини суришган. Айниқса, бу борада бир қатор боксчилар икки-уч маротаба Олимпиаданинг юқори пробали медалининг соҳиби ҳисобланишади. Мисол учун, кубалик Феликс Савон уч карра ғолиб бўлишга эриша олганди.

Биз эса, бокс бўйича икки маротаба Олимпиада ғолиблигини қўлга кирита олганларни эътиборингизга ҳавола этамиз.

Оливер Кирк  (АҚШ)

1904 йил АҚШнинг Сент-Луис шаҳрида бўлиб ўтган Олимпиада ўйинларида илк бора бокс мусобақалари ҳам ўтказила бошланди. Мазкур ёзги Олимпиада ўйинларида 18 нафар иштирокчи 7 вазн тоифасида жанг олиб борди ва уларнинг барчаси океан орти вакиллари эди. Шунинг учун бир боксчи бир нечта вазнда жанг олиб бориши мумкин бўлган. Кирк ҳам икки вазнда 52 ва 56 кгда иштирок этган ва бор йўғи ҳар бир вазнда биттадан жанг ўтказиб, иккисида ғолибликни қўлга киритган.

Ежи Задислав Кулей (Польша)

 1964 йил Токиода ўтказилган ёзги Олимпиада ўйинларида 63.5 кг вазн тоифасида иштирок этган ва финалда Собиқ Иттифоқ вакили Евгений Фроловни мағлуб этиб, олтин медални қўлга киритган. 1968 йилги Мехико Олимпиадасида эса кубалик Энрике Регуэйфрос устидан зафар қучиб, иккинчи маротаба Олимпиада ғолибига айланган.

Борис Лагутин (Собиқ Иттифоқ)

 1964 йилги Токио Олимпиадасида 71 кг вазн тоифаси финалида франциялик Жозеф Гонсалесни мағлуб этган Лагутин дастлабки олтин медалини қўлга киритади. Бунга қадар, 1960 йилги Рим Олимпиадасида бронзага эга чиққанди. 1968 йилги Мехикодаги тўрт йилликнинг энг нуфузли турнирининг ҳал қилувчи баҳсида кубалик Роландо Гарбей устидан зафар қучади ва иккинчи бор Олимпиада чемпионига айланади.

Анхель Эррера Вера (Куба)

1976 йил Монреаль Олимпиадасида 57 кг вазн тоифаси финалида ГДР вакили Рихард Новаковскийни мағлуб этиб, Олимпиада чемпиони бўлади. Орадан тўрт йил ўтиб, 1980 йил Москвада 60 кг вазнда мезбон Виктор Демьяненко устидан зафар қучади ва иккинчи бор Олимпиада ғолибига айланади.

Эктор Винент (Куба)

1992 йил Барселонада бўлиб ўтган Олимпиадада 63.5 кг вазнда канадалик Марк Ледюк устидан ғалабага эришиб, биринчи чемпионликни расмийлаштирган бўлса, 1996 йил Атланта Олимпиадасида германиялик Октай Уркални мағлуб этиб, навбатдаги олтин медални қўлга киритади.

Ариэль Эрнандес (Куба)

 1992 йил турнир финалида 75 кг вазнда АҚШлик Крис Бёрдни мағлуб этади ва ғолибга айланади. 1996 йил финалда туркиялик Малик Бейрологлу устидан қозонилган ғалаба унга иккинчи чемпионликни тақдим этади.

Олег Саитов (Россия)

1996 йил Атланта Олимпиадасида россиялик боксчи 67 кг вазн тоифасининг ҳал қилувчи жангида кубалик Хуан Эрнандес устидан зафар қучиб, дастлабки чемпионлигига эришади. 2000 йил Сиднейда бўлиб ўтган турнирнинг финалида украиналик Сергей Доценко мағлуб этилади ва иккинчи бор чемпионликни қўлга киритади. Шунингдек, 2004 йил Афинада бронза медалига ҳам эга чиқади.

Марио Кинделан (Куба)

 2000 йил Сидней Олимпиадасида 60 кг вазнда олтин медални қўлга киритади. У финалда украиналик Андрей Котельникни мағлуб этади. Иккинчи муваффақиятига орадан тўрт йил ўтиб, 2004 йил Афинадаги мусобақада эришади. Мазкур турнир финалида унга машҳур британиялик Амир Хон рақиблик қилади ва мағлубиятини қабул қилиб олади.

Гильерме Ригонда (Куба)

Ушбу кубалик чармқўлқоп устаси ҳам 2000 йил Сиднейда дастлабки чемпионлигига эришади. Турнирнинг 54 кг вазн тоифаси финалида россиялик Раимбек Малахбеков мағлуб этилади. 2004 йил Афинада эса, финал баҳсида таиландлик Воропая Петчкума устидан ғалаба қозониб, иккинчи бор чемпионликни расмийлаштиради.

Алексей Тишенко (Россия)

Россиялик боксчи 2004 йил Афинада дастлабки муваффақиятига эришади. Унга ушбу турнир финалида шимолий кореялик Ким Сон Гук рақиблик қилади ва мағлубиятга учрайди. Тишенко ушбу муваффақиятни орадан тўрт йил ўтиб, 2008 йил Пекин Олимпиадасида ҳам давом эттиради. Бу сафар у 60 кг вазнда иштирок этиб, финал жангида франциялик Дауда Совни мағлубиятга учратади.

Цзоу Шимин (Хитой)

Хитойлик ажойиб боксчи дастлабки олтин медалини ўз уйида яъни 2008 йил Пекинда бўлиб ўтган турнирда қўлга киритади. У 48 кг вазн финалида мўғулистонлик Пурэводоржин Сэрдамбани мағлуб этади.  2012 йилги Лондон Олимпиадасида ҳам у Пекиндаги муваффақияти тасодиф эмаслигини исботлаб, 49 кг вазн тоифасининг финалида таиландлик Кеу Понгпраюн устидан зафар қучади. Шунингдек, 2004 йилги Афина Олимпиадасида бронза медалини ҳам қўлга киритган.

Василий Ломаченко (Украина)

Украиналик истеъдод тўрт йилликнинг энг нуфузли турниридаги дастлабки олтин медалини 2008 йил Пекинда қўлга киритади. У 57 кг вазн тоифаси финалида франциялик Кедафи Желькир устидан зафар қучади. 2012 йил Лондон Олимпиадасида эса, 60 кг вазнда ҳал қилувчи жангда жанубий кореялик Хан Сун Чхол мағлуб этилади. 

Робейси Рамирес (Куба)

Кубалик яна бир истеъдод Рамирес дастлабки олтин медалини 2012 йил Лондон Олимпиадасида қўлга киритади. У мазкур турнирнинг 52 кг вазн тоифаси финалида мўғулистонлик Нямбаярин Тогсцогтни мағлуб этади. Навбатдаги 2016 йилги Рио-де-Жанейрода эса, 56 кг вазнда АҚШлик Шакур Стивенсонни мағлуб этиб иккинчи бор чемпионликни қўлга киритади.

Хуллас, шунақа гаплар... ҳамюртларимиз орасида ҳам бу натижани такрорлай оладиганлар албатта, топилади. Айниқса, Шаҳобиддин Зоировда бундай имконият мавжуд.Агар, Токиода ҳам муваффақият қозона олса, у ҳам икки бора Олимпиада чемпионлигини қўлга киритган боксчилар сафидан ўрин олади.