Бугун "Манчестер Сити" АПЛда 10 йиллик анъанага чек қўйиши мумкин

Аввал хабар берганимиздек бугун Англия премьер-лигасида мавсумнинг сўнгги тур учрашувлари бўлиб ўтади. Эътиборлиси, дунёнинг энг томошабон лигасида чемпионлик интригаси сўнгги тургача сақланиб қолди.

Айни дамда “Манчестер Сити” 95 очко билан мусобақа жадвалида пешқадамлик қилмоқда. Бироқ, ундан кейинги поғонани эгаллаб турган “Ливерпуль” ҳисобида 94 очко бор ва мерсисайдликларни пешқадамдан бор йўғи 1 очко ажратиб турибди холос.

Сўнгги турда Хосеп Гвардиола жамоаси сафарда “Брайтон” меҳмони бўлса, Юрген Клопп шогирдлари “Энфилд”да “Вулверхэмптон” қаршилигини синдиришга ҳаракат қилишади. Бугун АПЛнинг барча ўйинлари бир вақтда – 19:00да бошланади.

Агарда “Манчестер Сити” бугун чемпионликни тантана қилса, у ҳолда АПЛда сўнгги 10 йилда кетма-кет икки мавсум чемпион бўлган ягона жамоага айланади. Боиси, сўнгги бор премьер-лигада сэр Алекс Фергюсон бошчилигидаги "Манчестер Юнайтед" 2007/08 ва 2008/09 йилги мавсумларда чемпион бўлиб, ушбу номга сазовор бўлган эди.