“Челси”нинг Премьер-лига давридаги энг яхши футболчилари рамзий жамоаси: Лэмпард, Дрогба ва бошқалар!

Англия Премьер-лигаси мунтазам равишда ўзининг шиддати, кучли рақобати ва интригага бой ўйинлари билан омма эътиборини қозониб келган. Ушбу лигада дунёдаги энг тарихий ва кўплаб мухлисларга эга катта клублар ҳам талайгина. Энг кўп топ-жамоалар айнан “туманли альбион”да эканлиги ҳеч кимга сир эмас. Улар орасида XXI асрда ўтган 100 йилликдагига нисбатан кўпроқ муваффақиятларга эришган, жаҳон даражасидаги юлдузларни ўз сафида ўйнатган ва совринларни қалаштириб ташлаган “Челси” ажралиб туради.

2003 йил россиялик миллиардер Роман Абрамович Англияга ташриф буюради. АПЛнинг бир ўйинини трибунадан туриб томоша қилган ишбилармон инглиз клубларига қизиқиб қолади ҳамда улардан бирини сотиб олишни мақсад қилади. Оҳир-оқибатда инқироз арафасида бўлиб турган Лондоннинг “Челси” клубини танлаб, рекорд сумма(140 миллион евро)га уни сотиб олади. Ўшандан бери Абрамович жамоани ривожлантириш учун бир тийинини ҳам қизғанмаган ҳолда, топ-футболчи-ю, мураббийларни клубга олиб келишдан чарчамади.

Албатта, кўплаб юлдуз футболчиларни ўз сафига қўшиб олган ҳамда миллионлаб муҳлисларга эга бўлган жамоанинг Премьер-лига давридаги энг яхши аъзолари рамзий жамоасини тузиб чиқиш ҳам анча қизиқ бўлади. Айниқса, “Челси”нинг ашаддий мухлислари учун бу ўта қизиқарли бўлиши шубҳасиз. Демак, бошладик!

photo_2020-12-20_23-41-19_1

Дарвозабон: Петр Чех

“Ренн”дан атиги 7 миллион евро эвазига Лондон клуби сафига келиб қўшилган чехиялик дарвозабон ўз ўйинлари ва қаҳрамонликлари билан “Челси” мухлислари қалбидан абадий жой эгаллаган ҳамда номини клуб тарихига ўчмас ҳарфлар билан муҳрлаб кетган. Чех клуб сафида энг яхши ўйинини жамоа учун энг керакли ўйинда кўрсата олгани билан ҳам бошқалардан ажралиб туради. Петр 2012 йил Мюнхенда ўтказилган ЕЧЛ финалида “Бавария”га қарши ўйиндаги супер қаҳрамонлиги билан ҳалигача ёдга олинади. Ўшанда у экстра-таймларда Роббен тепган пенальтини қайтарган ҳамда жамоасини пенальтилар сериясигача олиб борган. Ундан кейин 2 та пенальтини бартараф этиб, кубокни боши узра баланд кўтарган. Шубҳасиз, бу “Челси”нинг XXI асрдаги энг муҳим учрашувларидан бири эди ва бизнинг қаҳрамонимиз бу ўйинда ўзини кўрсата олган. Булардан ташқари, афсонавий дарвозабон 4 та АПЛ кубоги, 4 та Англия кубоги, 3та Лига кубоги ва Европа Лигасини ютишга муваффақ бўлган.

photo_2020-12-20_23-31-26 (2)_1

Ўнг қанот ҳимоя: Бранислав Иванович

2008 йилда Москванинг “Локомотив” клубидан “Челси” сафига келиб қўшилган Бранислав Иванович дастлаб, жамоага киришиб кетиши қийин кечган бўлса-да, кейинчалик жамоанинг алмаштириб бўлмас ўйинчисига айланади. Бранислав “Челси” билан 3 та Премьер-Лига, 3 та Англия кубоги ва Лига кубоги ғолиблиги, ЕЧЛ ва ЕЛ чемпионлигини қўлга киритган ўта совриндор футболчи ҳисобланади. Бундан ташқари, россиялик афсона клуб тарихидаги 2-тўпурар ҳимоячи ҳамдир. Умумий ҳисобда 377 учрашувда майдонга тушиб, ўзининг даражасини паст дея баҳолаган барчага ўзини қўрсатиб қўйган футболчи ҳалигача “Челси” клуби мухлисларининг севимлиси бўлиб қолмоқда. Рус футболи фахри!

photo_2020-12-20_23-31-26_1

Марказий ҳимоя: Жон Терри ©

Жон Террини таърифлаш учун 3 та сўз етарли, бизнингча. Сардор, етакчи, афсона! Шубҳасиз, клуб тарихидаги энг буюк футболчилардан бири, ҳам сифатли ўйини, ҳам ғалабага бўлган кучли иродаси билан мақтана олувчи супер ҳимоячи. “Челси” академияси тарбияланувчиси бўлган Терри доимий равишда жамоанинг асосий таркибида майдонга тушганлиги боис(717 та ўйин) “Стэмфорд Бриж”да клуб фанатлари томонидан “Жаноб Челси” деган фахрли унвонни олган. Совринлар борасида эса у кўкрак кериб мақтана оладиган даражада кўп ютуқларга эришган: сардор сифатида клубининг 5 та Премьер-лига, 5 та Англия кубоги, 3 та Лига кубоги, Чемпионлар Лигаси ва Европа Лигаси титулларини қўлга киритишида катта ҳисса қўшган. 

photo_2020-12-20_23-31-27 (4)_1

Марказий ҳимоя: Рикардо Карвальо

Рикардо Карвальо “аристократлар”нинг ҳақиқий инқилоби бўлган. Жозе Моуриньо билан бирга “Порту”дан келган португал Жон Терри билан ҳимоя марказида ажойиб жуфтлик ҳосил қилиб, “Челси”нинг Чемпионлар Лигасида зафар қучишида асосий роллардан бирини ижро этган. Ушбу футболчилар ўша пайтда Премьер-лиганинг энг даҳшатли ҳимоя жуфтлиги сифатида мутахассисларнинг эътиборини қозона олган. Террининг садоқати, Карвальонинг тезкор ва сифатли ўйинини лондонликлар ҳалигача фахр билан хотирлашади. Совринлар: 6 мавсум ичида 3 та Премьер-лига, 2 та Лига кубоги ва Англия кубоги қўлга киритилган.

photo_2020-12-20_23-31-27 (3)_1

Чап қанот ҳимоя: Эшли Коул

“Челси”нинг Премьер-лига давридаги энг яхши чап қанот ҳимоячиси, ва кўп эҳтимол билан бутун бошли Премьер-лиганинг энг зўр чап қанот ҳимоячиси ҳамдир. “Арсенал”ни муаммоли тарзда тарк этганига қарамай, футболчи АПЛ, Чемпионлар Лигаси, Европа лигаси, Лига кубоги ва 4 бора Англия кубогида зафар қучиб, мухлислари олдида ўзини анчагина оқлашга эришди. Ҳозирда нафақага чиққан Эшли Коул “Кобхэм” ўқув марказида академия мураббийи бўлиб ишламоқда ва ўз билимларини келгуси авлодга улашишда жонбозлик кўрсатмоқда. Агар у ўзига ўхшаган шогирд етиштириб бера олса, “Челси” уни қўйиб юбормаслиги шубҳасиз!

photo_2020-12-20_23-33-38_1

Ярим ҳимоя: Фрэнк Лэмпард

Баъзи “Челси” мухлислари томонидан Терри эмас, айнан Лэмпард клубнинг Премьер-лига давридаги энг яхши футболчиси сифатида эътироф этилади. Бир томондан ўйлаб қарасак, у бунга ҳақли. Сабаби, ҳужумкор ярим ҳимоячи “Челси” либосида умумий 211 баҳсда майдонга тушиб, клубнинг барча даврлардаги энг яхши тўпурари унвонини қўлга киритган, жамоага умрини бағишлаган. 2001 йилда Лондоннинг бошқа жамоаси бўлмиш “Вест Хэм”дан “аристократлар” сафига келиб қўшилган собиқ ярим ҳимоячи умумий миқдорда 11 дан ортиқ жамоавий совринлар (3 та Премьер-лига, 4 та Англия кубоги, 2 та Лига Кубоги, Чемпионлар Лигаси ва Европа Лигаси) ва бир қанча индивидуал ютуқларга эришган. Ҳозирга келиб, у Ғарбий Лондонга менежер сифатида қайтган ва севимли жамоасининг муваффақиятларига ўз ҳиссасини қўшишда давом этмоқда. Шубҳасиз, афсона!

photo_2020-12-20_23-31-27_1

Ярим ҳимоя: Клод Макелеле

Француз футболчиси ўз позициясида шу қадар яхши ўйнардики, ундан илҳомланиб, бутун Англия футболида ярим ҳимоя марказини “Макелеле позицияси”, дея аташар эди. У клуб ярим ҳимоясида шу қадар кучли тартиб ўрнатган эдики, бу тартиб клубга ҳаттоки, мухлислар ҳам ишонмаган ютуқларнинг келишига сабабчи бўлган. 2003 йилда “Реал” унинг истеъдодига паст баҳо берганлиги боис Лондон клубига келиб қўшилади ва дастлабки мавсумлариданоқ клуб мухлисларининг севимлисига айланиб, бир қанча совринлар ютишга муваффақ бўлади. Моуриньо бошчилигидаги жамоанинг юрагига айланган Макелеле Лига кубоги, Премьер-лига ва Англия кубогида бир неча бор зафар қучган ва ҳозирга келиб клубнинг кредит бўлимида техник мураббий лавозимида фаолият олиб бормоқда. Мухлислар уни бутун умр яхши кўришади, чунки бу учун етарли даражада меҳнат қилган.

photo_2020-12-20_23-31-27 (2)_2

Ярим ҳимоя: Нголо Канте

Нголо Канте “Челси”нинг сўнгги 5 мавсумда амалга оширган энг яхши трансфери ҳисобланади. 2016 йилги “Лестер эртаги”нинг асосий қаҳрамонларидан бири бўлган Канте ўша мавсумда “Йил ўйинчиси”, дея эътироф этилган ва ўйинини мутлақо бошқа даражага олиб чиққан. Ушбу совринга келгуси йили "Челси" футболчиси сифатида ҳам эришган француз хавбекини Лондонда ҳам ёқтириб қолишади. Жаҳон чемпиони Конте жамоасида ҳам, Сарри жамоасида ҳам асосий фигуралардан бири бўлиб хизмат қилган ва доимий равишда асосий таркибда майдонга тушган. Меҳнаткаш Канте кейинчалик ўз совринлари орасига Европа лигаси ва Англия Лига кубоги титулларини ҳам қўшиб олади. Ҳозирга келиб, Лэмпард жамоасида ёшларга ўрнак бўлувчи асосий фигуралардан бири бўлиб майдонда ҳаракат қилмоқда.

photo_2020-12-20_23-31-28 (3)_1

Вингер (ўнг қанот): Жанфранко Зола

Жанфранко Зола ғарбий Лондонга Абрамович келгунига қадар ҳам жамоанинг алмаштириб бўлмас, камдан кам ўйинчиларидан бири бўлган. Италиялик даҳо 1996 йилда “Парма”дан “Стэмфорд Бриж”га кўчиб ўтади ва шундан кейин ғарбий Лондонда ҳақиқий инқилоб юзага келтиради. Зола 1997 йилда Футбол Ёзувчилар Уюшмаси (FWА) версиясига кўра, “Йилнинг энг яхши ўйинчиси” совринини қўлга киритади. Зола совринлар борасида ҳам мақтана олади: Англия кубоги, Лига Кубоги, Суперкубоги ва Кубок эгалари кубогини қўлга киритган ҳамда жуда катта муваффақиятлари натижасида Абрамовичнинг “Тоттенхэм” ўрнига “Челси”ни сотиб олишига сабабчилардан бири бўлди.

photo_2020-12-20_23-31-28_2

Марказий ҳужумчи: Дидье Дрогба

Лондонда “Стемфорд Бриж қироли” лақаби билан танилган кот-д'ивуарлик супер ҳужумчи “Челси” тарихидаги энг яхши хорижлик футболчи ҳам ҳисобланади. “Марсель”дан 25 миллион фунт-стерлинг эвазига Лондон клуби сафига келиб қўшилган Дидье ўзининг самарали ўйинлари орқали тез орада клубнинг 50 йилдаги илк совринини ютишига ёрдам беради. Шунингдек, у 4 марта АПЛни, 3 марта Лига кубогини ва Англия кубогини ҳам ютган, Чемпионлар Лигасида зафар қучган. 2012-йилги Мюнхен финалидаги қаҳрамонлиги учун Дрогба ҳозиргача ёрқин хотиралар билан эсланади. Ўшанда футболчи 88-дақиқада Нойер дарвозасини ишғол қилиб, жамоасининг қўшимча бўлимларда ўйинни давом эттиришига замин яратади. Сўнгра, пенальтилар сериясида ўз имкониятини бехато ижро этиб, “шалпангқулоқ”ни боши узра баланд кўтаради. Тўғри, Дрогба “Стэмфорд Бриж” кўрган энг сермаҳсул ҳужумчи бўлмагандир, аммо у керакли пайтда гол уриб, жамоасига фойда келтира олган ва шу сабабли тарихга кирган. Бу ўрин учун у мутлақ ҳақли.

photo_2020-12-20_23-31-33_1

Вингер (чап қанот): Эден Азар

“Челси” 2012 йилда Азар учун “Лилль”га 32 миллион фунт-стерлинг миқдорида пул тўлайди ва ушбу сумма ўзини мутлақо оқлайди. Чиройли ўйини, ёрқин ҳаракатлари ва тезкор қувноқ футболи эвазига бутун Англия футболи мухлисларини ўзига қаратиб қўя олган Азар 7 йил давомида “аристократлар” сафида тўп суради ва голлари билан биргаликда ассистлари сонини ҳам бирдай ошириб боради. 2019 йилда “Реал”га ўтар экан, у клуб сафида 110 дан ортиқ гол ва яна шунча голли пасга муаллифлик қилган ҳолда, 6 та соврин қўлга киритган ва “кўклар”нинг барча мухлислари қалбидан ўзи учун абадий жой эгаллаган эди. Бельгиялик суперюлдуз доим клубнинг севимлиси бўлиб қолаверади.

photo_2020-12-20_23-31-28 (2)_1

Бош мураббий: Жозе Моуриньо

“Челси” россиялик миллиардер бизнесмен Роман Абрамович қўлига ўтганидан сўнг, жуда кўплаб мураббийларни ўзида синаб кўрди. Сабаби, Абрамович мураббийга бир мавсумдан кўп имконият бермайди - ютуқ қўлга киритилмаса, чиқиш эшиклари кўрсатилади. Шундай бўлса-да, Моуриньо “Челси”да умумий 4 мавсум ўтказади ва 3 бора Премьер-лига чемпиони қилади. Бундай натижага ҳали ҳеч бир “Челси” мураббийи эриша олмаган. Шу сабабли, рамзий жамоамизга “Special one”ни киритдик.

photo_2020-12-20_23-31-29_1

Захира ўриндиғи

“Челси”да Премьер-лига даврида буюк футболчилар шу қадар кўп бўлганки, ҳатто рамзий жамоа тузишда унга Арьен Роббен, Давид Луиз, Жон Оби Микель, Виллиан ва Паулу Феррейра сингариларни киритишнинг иложи йўқ. Бизнинг талқин бўйича захира ўриндиғи қуйидагича ўрин олган:

Дарвозабон: Тибо Куртуа. “Реал”га кетмасиданоқ, ўзини жаҳон даражасидаги дарвозабон сифатида кўрсата олган ва клуб муваффақиятларига муносиб ҳисса қўшган;

Ҳимоячилар: Гари Кэхилл ва Цезар Аспиликуэта. Кэхилл 2012 йил ЕЧЛдаги муваффақиятли мавсумда жамоанинг ажралмас футболчиси бўлган, Аспиликуэта эса узоқ йиллар давомида жамоа сардори ва кучли ҳимоячи бўлган;

Ярим ҳимоячилар: Майкл Эссьен, Хуан Мата. Майкл Моуриньо қўл остида очилган супер футболчи бўлган ва узоқ вақт позициясидаги ўрнини ҳеч кимга бериб қўймаган. Мата эса кетма-кет 2 мавсум клубда “Йилнинг энг яхши ўйинчиси” деб эълон қилинганлиги боис бу ўрин учун муносиб;

Ҳужумчилар: Диего Коста. Дрогбанинг захираси учун идеал номзод, ҳақиқий топ страйкер, голеадор.

Абдулла Маннонов тайёрлади

Матнда хатолик топсангиз, ўша хатони белгилаб, бизга жўнатинг (Ctrl + Enter)

Минбар

Барча блоглар