Футболчиларимиз нега ўртамиёна чемпионатларни танламоқда ёхуд Индонезиядаги ҳамюртларимиз ҳақида

Охирги вақтларда легионерларимиз сони ошиб бормоқда. Айрим ўйинчилар Корея ва Япония лигаларини танлаётгани бежиз эмас. Футболи юқори бўлган чемпионатларда тўп суриш орқали бу футболчилар терма жамоага номзод эканлигини сақлаб қолишади. Бошқалари эса пул томонлама яхши бўлган ўртамиёна ёки энди ўсишга эришаётган лигаларни афзал билмоқда. Бугун, Индонезия чемпионатида ва у ерни танлаган футболчиларимиз борасида сўз юритамиз.

Кимлар ташриф буюрди?

Павел Смоляченко ("Арема"), Шукурали Пўлатов ("Семен Паданг") ва Жавлон Гусейнов ("Борнео")

Аслида Индонезияда легионерларимизнинг сони 4тани ташкил қилиши мумкин эди. Бироқ Жаҳонгир Абдумўминов "Персижа" билан шартнома имзолаган эди. Клуб сафида бир нечта ўйинларда майдонга тушган ҳам эди. Кейинчалик Абдумўминов клубни тарк этди. Шунга қарамай, у ерда 3та ўзбекистонлик чарм тўп усталари бор. Хусусан, ўтган мавсумни "Металлург"да ўтказган Павел Смоляченко яна легионер мақомини олди ва "Арема" билан шартнома имзолади. Эслатиб ўтиш керак, Павел илгари Малазияда ҳам тўп сурган эди. Таиланда ўйнаган Жавлон Гусейнов ҳам қисқа танаффусдан сўнг яна легионер футболчига айланди ва "Борнео" билан келишувга эришди. "Нефтчи"да ишончли ўйинлари билан ном қозонган Шукурали Пўлатов эса элитага қайтган "Семен Паданг" билан шартнома имзолаган.

Индонезия футболи ҳақида

Ушбу мамлакатда 3та мусобақа мавжуд бўлиб, Суперлига, Президент ва Индонезия кубоклари мавжуд. Суперлигада 18та жамоа уй ва сафар тизимида икки даврали тарзда баҳс юритади. Мусобақада учта клуб қуйи лигага тушиб кетса, чемпион ва вице-чемпионлар халқаро беллашувларда майдонга тушиш имкониятини қўлга киритади. Шунингдек, мамлакатда Президент кубогига ҳам катта эътибор қаратилади. Бу турнирда 64та жамоа иштирок этади ва улар бош соврин учун курашади. Индонезияда футбол ривожланиш остонасида дейиш мумкин. Йилдан - йилга клублар молиявий томондан кучайтирилиб, яхши савиядаги легионерларни таклиф этиш орқали лига савиясини оширмоқда. Янги мавсум Индонезияда 8 май санасида старт олади ҳамда декабрнинг биринчи ҳафтасида поёнига етиши кўзда тутилган.

Стадионлар

Айтиш керакки, Индонезияда футболни жуда севишади. Биргина "Персижа" жамоаси тўп сурадиган "Миллий" стадионга ҳар бир учрашувни томоша қилиш истагида 70-80 минг нафар мухлис ташриф буюради. "Арема", "Бали Юнайтед", "Мадура Юнайтед", Персипура Жаяпура" ва "Персиб Бандунг" жамоалари стадионлари ҳам доимий равишда мухлислар билан тўлиб-тошади..

Легионерлар

Индонезияда ҳам 3+1 легионерлар лимитидан фойдаланишади. Клублар молиявий томонлама юқори бюджетга эга сабабли, яхши савиядаги чарм тўп усталарини таклиф қилишади. "Бали Юнайтед", "Мадура Юнайтед", "Персижа", "Персиб Бандунг" ва "Макассар" клублари молиявий жиҳатдан катта клублар ҳисобланади. Одатда бу ерда минимум 4000 АҚШ доллари миқдорида маош берса, айрим жамоалар 20 000 АҚШ доллари атрофида маош тўлашади. Охирги йилларда ўзбекистонлик футболчиларнинг ҳам сони ошиб бормоқда. Илгари Павел Саломин бу ерда тўп сурган эди. Шундан кейин Павел Пуришкин, Дилшод Шарофетдиновлар ҳам фаолиятининг бир мунча қисмини Индонезияда ўтказган эди. Клублар осиёлик футболчи лимитига айни вақтда Ўзбекистондан футболчи таклиф қилиш одат тусига кираётгани ҳам бежиз эмас.

Қандай юлдузлар тўп суришган

Юқорида айтиб ўтганимиздек, Индонезия клублари молиявий томондан анча бақувват ҳисобланади. Охирги йилларда бу ерда Майкл Эссьен , Дидье Зокора, Питер Одемвинге, Карлтон Коул сингари футболчилар тўп суришди. Илгари "Ливерпуль" сафида кўплаб голлар урган Робби Фаулер ҳам фаолият олиб борган. "Насаф"даги ишончли ўйинлари билан ном қозонган Боян Малишич ҳали ҳамон Индонезияда тўп сурмоқда.