КХДР ҳақида

КҲДР терма жамоаси жаҳон чемпионатида 2 маротаба, 1966 ва 2010 йилларда иштирок этган.

1966 йилги жаҳон чемпионатидаги иштирок Шимолий Кореянинг хақиқий шон-шуҳрати бўлган. Мусобақанинг чорак финалига борган корейслар кўпчиликни ҳайратга солишди, аммо жамоа таркибида кўплаб профессионал бўлмаган футболчилар тўп тепишган. Гуруҳ босқичида аввалига СССР термасига 0:3 ҳисобида имконият бой берилган, 2-турда Чили термаси билан 1:1 ҳисобидаги дуррангга эришган КҲДР 3-турда Италия термасини 1:0 ҳисоби билан мағлуб этган. Бу Италия футболи тарихидаги энг оғир мағлубиятлар қаторига киритилади. Чорак финалда Португалия дарвозасига 24-дақиқагача 3 та гол уришга эришиб, Шимолий кореяликлар ҳаммани шокка солишди, аммо якунда 3:5 ҳисобида имкониятни бой бериб қўйишди. Шундай бўлса-да, чорак финалгача чиқган КҲДРнинг фантастик натижаси тарихга кирди. Бу бутун Осиё футболининг ютуғи эди. Бунгача Осиёнинг бирорта вакили жаҳон чемпионатида гуруҳ босқичидан нарига ўта олмаганди.

Аммо ойнинг ўн беши ёруғ, ўн беши қоронғу деганларидек, 2010 йилги жаҳон чемпионатида КҲДР катта муваффақиятсизликга учради. Аввалига барчаси яхшидек кўринганди. Гарчи имкониятни бой берган бўлсалар-да, Бразилия термаси билан чиройли ўйин намойиш этишганди. Аммо Португалия корейсларга жавобсиз еттита тўп киритди. Қитъадошларимиз шармандаликни мамлакатда ҳазм қилишга бирмунча қийналишган. Ҳатто турнирдан сўнг, терма жамоанинг бош мураббийини қамоқга олинганлиги ҳақида миш-мишлар ҳам янграганди.

Шимолий Корея жаҳон чемпионатидаги 2 та иштирокдан ташқари, 1976 йили олимпия ўйинлари, 1980, 1992, 2011, 2015 ва 2019 йилларда эса Осиё Кубогида иштирок этган. 1978 йили Осиё ўйинлари мусобақасида корейслар чемпион бўлишга ҳам улгуришган.

Ҳозирда терма жамоага Ким Ён Жун бош мураббийлик қилмоқда. Терма жамоада Ри Мён Гук энг кўп 105 та учрашув ўтказган. Чон Ил Гван ҳам ўз номини тарихга ёздириб қўйган. У КХДР таркибида 21 та гол уришга эришган ва бу энг кўп гол урган футболчидир.

1956 йил 7 октябрь куни КҲДР ўз тарихидаги илк ўйинини ўтказади. Хитой термаси билан беллашувда КҲДР 1:0 ҳисобида зафар қучади. Шимолий Корея 2005 йилда Гуам термасини 21:0 ҳисобида мағлуб этиб, ўз тарихидаги йирик ғалабасига эришади. Боя таъкидлаб ўтганимиз, Португалиядан учралган 7:0 ҳисобидаги мағлубият КҲДРнинг тарихидаги энг йирик мағлубият бўлиб турипти.

Кореяликлар билан шу пайтгача 9 бор тўқнаш келганмиз. Учрашувларнинг 6 тасида вакилларимиз зафар қучишган. 3 та ўйинда дуранг ва битта мағлубиятга учралган. Умумий 16 маротаба шимолликларга гол урган Ўзбекистон ўз дарвозасидан 7 та тўп олиб чиққан.

Энг йирик ғалабамиз 4:0. 1998 йили Осиё ўйинларида Шквирин ҳамда Акопянц биттадан ва Ширшовнинг дубли эвазига ана шу натижа қайд этилган.

2015 йил Пхеньян шаҳрида меҳмон бўлган терма жамоамиз беллашувнинг биринчи бўлимидаёқ ўз дарвозаларидан 4 та тўп олиб чиқишган. Танаффусдан кейин Сардор Рашидов ва Игор Сергеевнинг голлари эвазига ҳисобни 2 тага қисқартиришган ҳолос. Бу натижа корейсларга учралган энг йирик мағлубиятимиз бўлиб тарихга кирган.

Ўзаро ўйинларда энг кўп гол урган футболчи Игор Сергеев. 2015 йили Шимолий Корея термаси билан 3 марта тўқнаш келган ҳужумчи ҳар гал биттадан гол урган.

КХДРга қарши 9 беллашувларнинг 5 таси Тошкентда кечган. 2 тасида бизникилар меҳмон бўлишган ва яна 2 та учрашув эса беътараф майдонларда бўлиб ўтган.