Мадридликлар ашаддий рақиб – “Барса”дан 100 млн евролик футболчи сўраяпти!

Испания чемпионлиги учун курашаётган “Атлетико” асосий рақобатчиларидан ҳисобланган “Барселона” футболчиси Рикард Пучга кўз тикмоқда.

Мадрид клуби раҳбарияти 21 ёшли ярим ҳимоячини жамоани тарк этиши кутилаётган асосий юлдузлардан бири Сауль Ньигесга ўринбосар сифатида кўрмоқда. “Атлетико” бош мураббийи Диего Симеонега креатив футболчининг майдон марказидан ташқари, қанотларга яқин позицияларда ҳам ўйнай олиши маъқул келмоқда.

Бу трансфер амалга ошишига Пучнинг трансфер суммаси тўсқинлик қилиши мумкин. “Барселона” футболчининг шартномасида унинг бадал пули 100 миллион евро эканини белгилаб қўйган ва бу битим 2023 йилнинг ёзигача давом этади.

Рикард Пуч жорий мавсумда 11 та учрашувда қатнашиб, битта гол уришга эришди.