ПСЖ кўча футболи услубида "Бавария"ни ЕЧЛдан чиқариб юборди. Ёхуд чорак финалнинг энг ёрқин жуфтлиги қарама-қаршилиги ҳақида гаплашамиз

Чемпионлар Лигасининг жорий мавсум чорак финал босқичидан ўрин олган асосий қарама-қаршилик тақдири ҳал бўлди - турнирнинг амалдаги ғолиби ўйиндан чиқди. ПСЖ Мюнхенда қўлга киритилган устунликдан фойдаланиб, уни бой бермади. Ҳа, Почеттино шогирдлари Парижда мағлуб бўлди, аммо энди бу ҳисоб кимни қизиқтиради? Ҳа, албатта, ҳеч кимни! Қуйида ушбу учрашувнинг асосий хулосалари ҳақида гаплашамиз.

“Бавария” ярим финалга муносиб ўйин кўрсатмади

Ханс-Дитер Флик ПСЖга қарши ўйинлар олдидан жуда кўп йўқотишларга дуч келди. Левандовски, Гнабри ва Горецканинг йўқлиги, айниқса, жуда катта йўқотиш бўлди, аммо Мюнхендаги ўйинда бу муаммолар "Бавария"нинг ПСЖни эзишига тўсқинлик қилмади. Ҳа, немислар голлар бўйича ютқазди, аммо улар ўйин давомида парижликларни вазиятларга кўмиб ташлашди. Жавоб ўйинидан олдин жароҳат олганлар рўйхатига Зюле ҳам қўшилди.

Статистикага кўра, Париждаги ўйинда меҳмонлар кўп жабҳада яна ПСЖни ортда қолдирди, бироқ Германия чемпиони керакли натижа қайд эта олмади. Шу куни "Бавария" ўзига ўхшамади. Жамоа олдиндан тахмин қилинган кўринишга эга эди, аммо улар ПСЖга нисбатан ўз устунликларини амалга ошира олмади (тўпга эгалик қилиш ва позицион кўрсаткичлар). Бунга қисман Левандовски ва Гнабри йўқлиги сабаб бўлди. Натижада “Бавария” футболчилари қанотлардан киришга мажбур бўлди. Шу куни Почеттино қанотларга тажрибали футболчилар ўрнига икки ёш футболчи - Дагба ва Диаллони майдонга туширишга қарор қилди. Бир қарашда Коман ва Сане уларни кўзларини юмиб ҳам доғда қолдирадигандек туюлди. Принципиал жиҳатдан Кингсли ва Лерой бу вазифаларни уддалашди, аммо улар "ёшларни" ортда қолдирган бўлсада,  ҳужумни давом эттириш учун имкониятларга эга бўлмади. Париж клубининг мудофаа маркази ўз ишини аъло даражада уддалади ва рақиб ҳужумчиларига имкон қолдирмади. Дарҳақиқат, ҳамма ҳужумлар қанотдан амалга оширилди ва жарима майдончасига кириш учун кўплаб уринишлар барбод бўлди.

Гарчи ташаббус мюнхенликлар томонида бўлган бўлса-да, сўнгги дақиқаларга қадар “Бавария” ПСЖни босим остида ушлаб тура олмади. Почеттино шогирдлари Германияда бўлгани каби "Бавария"га ўз жарима майдонларида эркин ҳаракатланиш имконини бермади. Мюнхенликларнинг асосий қуроли ҳисобланган кучли прессинг ҳам кутилган даражада иш бермади. "Бавария" футболчилари чиндан ҳам тўпни олдиргач, уни қисқа муддатда қайтариб олди. Бироқ ПСЖ рақиб хатоларидан фойдаланиб кичик вазиятлар яратди. Немислар ўйин давомида агрессивроқ ҳаракат қилди ва мезбонларнинг етакчи футболчиларини гуруҳ бўлиб ёпишга уринди. Лекин ПСЖ футболчилари биргина аниқ пас орқали ушбу гуруҳларни доғда қолдирди.

Бундай эпизодлар жуда кўп бўлди. ПСЖ техника ва тезликка асосланган ўз устунлигидан самарали фойдаланди. Аммо баъзи мутахассисларнинг таъкидлашича, бу босимдан чиқишнинг жуда хавфли усулидир. Индивидуал прессинг пайтида дриблингчиларнинг ўрни тобора ортиб бормоқда ва юлдуз футболчиларнинг дриблинглари яқин келажакда тактик қуролга айлиниши мумкин.

"Бавария" ярим финалга чиқишга лойиқмиди? Эҳтимол. Биринчи ўйинда Ханс-Дитер Флик жамоаси жуда кўп қўпол хатоларга йўл қўйди ва ҳужумни якунлашда жиддий муаммоларга дуч келди. ПСЖнинг асосий кучи – дриблингчи футболчилар орқали босимни енгиш. Немис гранди сафардаги ўйинда жуда зерикарли кўринди. Почеттино эса “Бавария”га “Аллианз Арена"даги эркинликни бермасдан, биринчи ўйинданоқ хулоса чиқаришга муваффақ бўлди. Албатта, Левандовски, Гнабри ва Горецка билан ҳаммаси бошқача сценарий бўйича кетиши мумкин эди, аммо ПСЖ оптимал таркибда ўйнади, айниқса Мюнхенда. Ҳар қандай ҳолатда ҳам немисларда ярим финалга чиқиш учун қулай имконият бор эди. "Бавария" улардан фойдаланмади ва бунинг учун жазоланди.

Ниҳоят ПСЖ муаммоларни ҳал қиладиган клубга айланяптими?

ПСЖ кетма-кет иккинчи марта Чемпионлар Лигаси ярим финалига чиқди. Бир йил олдин Томас Тухель бошчилигидаги жамоа бунга юқори сифатли ташкилий ишлар туфайли эришган эди. Германиялик мутахассис ҳатто Неймарни тарбиялай олди. Почеттино келиши билан ёндашув ўзгарди. Французлар мураккаб тактик схемалардан воз кечишди. Ҳозир юлдузлар ҳимояда ёрдам беришмайди, босим ҳам йўқ, аммо футболчилар майдонда ҳақиқий мўжиза яратмоқда. ПСЖ кўрсатаётган футбол худди кўча футболига ўхшайди. У ерда ҳеч қандай мураккаблик йўқ - фақат техника, тезлик ва зарба. ПСЖ айни дамда Неймар, Мбаппе ва Ди Мариянинг тезлиги ва техникасидан тўлиқ фойдаланишга уринмоқда.

Дарҳақиқат, ПСЖ ҳозир Франция чемпионатида пешқадам эмас, аммо Чемпионлар Лигасида парижликлар аллақачон "Барселона" ва "Бавария"га чиқиш эшикларини кўрсатиб қўйди. Аммо Почеттино шогирдларининг ажойиб услуби бу билан тўхтаб қолмаслиги керак. Ҳозирги ПСЖнинг Чемпионлар Лигасида намойиш қилаётган ўйини "футбол" сўзига ҳамоҳангдир. Чемпионлар Лигаси ярим финалида бундай жамоани кўриш жуда ёқимли, чунки ўтган мавсум ҳал қилувчи ўйинларда жуда кўп мураккаб тактик ўйинлар бўлган.