Қандай қилиб 12 ёшда Маурисио Гиннеснинг «рекордлар» китобидан ўрин эгаллади?!

Гиннеснинг рекордлар китобида бир нечта футболчининг номини кўриш мумкин. Пеле футбол тарихида энг кўп гол киритган футболчи бўлса, Паоло Мальдини энг ёши катта чарм тўп устасига айланган. Франц Беккенбауэр эса, мундиалда футболчи ва мураббий сифатида ғалаба қозонган ягона шахс саналади. Таниқли футболчилар орасида боливиялик ҳужумчи Маурисио Бальдивьесо ҳам мавжуд. У ушбу китобга энг ёш футболчи сифатида киритилган.

Профессионал футболдаги дебют

Қаҳрамонимиз ўзининг дебют ўйинида 12 ёш 360 кунлик эди. 2009 йилнинг 19 июль санасида «Аурора» клубида кадрлар билан муаммо юзага келди. Жароҳат олганлар сони 12 тага етгани учун ҳам мураббий ёшлар жамоасидаги футболчиларга эътиборини қаратди. «Ла Пас»га қарши муҳим баҳсда «Аурора» бош мураббий Хулио Сезар Бальдивьесо ўзининг 12 ёшли ўғлини 84-дақиқада «жангга» ташлади. 10-рақамда майдонга тушиб келган футболчи ўзи билмаган ҳолда Гиннеснинг рекордлар китобидан жой эгаллади. Шу кунга қадар, ҳеч ким 12 ёшда профессионал футбол учрашувида иштирок этмаган эди. Эътиборлиси шундаки, Бальдивьесоларнинг кичиги ўзини майдонда йўқотиб қўйгани йўқ. Бир неча бор тўпга тегинди ва хавфли жарима зарбасини ишлаб берди.

«Ла Пас» ҳимоячиси Ромуло Алаку 12 ёшли болакай ўзини алдаб ўтганини ҳазм қила олмади ва унга нисбатан қўполлик ишлатди. «Аурора»нинг уй стадионига йиғилган мухлислар ўртасида шовқин кўтарилди. Дебют қилган футболчини майдондан ташқарига олиб чиқилди, аммо Маурисио яна майдонга қайтишга ўзида куч топди. Ўша баҳсдан сўнг, «Аурора» бош мураббийи рақибни кескин танқид қилди.

Хулио Сезар ўз ўғлини тез-тез майдонга туширмоқчи эди, аммо клуб раҳбарлари бунга қаршилик қилди. Оқибатда, мутахассис клубни тарк этди. Ўзи билан футбол оламидаги энг ёш дебют қилган ўғлини ҳам олиб кетди.

Ёш футболчи «Реал» Мадрид ёки «Манчестер Юнайтед»да тўп суришни орзу қилар эди, бироқ реал воқелик ўзгача кўриниш олди. Орадан икки йил ўтгач, Маурисио отаси билан биргаликда «Аурора»га қайтиб келди. 2012 йилда футболчининг отаси истеъфога чиқарилди, қаҳрамонимиз эса асосий таркиб учун кураш олиб бориш мақсадида клубда қолди. Оқибатда, 2012/13 йилги мавсумда клуб уни Боливия чемпионати учун қайдномага киритди.

2013/14 йилги мавсумда қаҳрамонимиз отаси бошқарувидаги «Реал» Потос клуби билан шартнома имзолади. Янги жамоада ёш футболчини жуда илиқ кутиб олишди, аммо кутилган натижа юз бергани йўқ. Бу пайтга келиб, Маурисио 16 ёшга тўлган ва бемалол профессионал футбол билан шуғулланишни бошлаган эди. Афсуски, бу сафар ҳам омад унга кулиб боқмади. Отаси ишдан кетгач, клуб у билан шартномани бекор қилди. Бальдивьесолар биргаликда учинчи бор «Аурора»га қайтиб келишга қарор қилди. Бу сафар ёш футболчи клубнинг асосий таркиб аъзосига айланди. «Аурора»даги 3-уриниш анча омадли чиқди. Ёш Бальдивьесо 19 та ўйинда 3 та гол киритди ва «Хорхе Вилстерман» клуби билан шартнома имзолади.

Ушбу шаҳардаги энг кучли клубга ўтгач, Маурисио асосий таркибдан муқим ўрин эгаллай олмади. Тўғри, 20 ёшгача бўлганлар орасида Боливия ёшлар терма жамоасида тўп сурди, аммо бу у эришган энг катта ютуқ бўлиб қолди. Эквадор ёшларига қарши ўйинда 45 дақиқа тўп сурган ҳужумчи бошқа миллий жамоа либосини киймади. 2016 йилга келиб, у «Хорхе Вилстерман» сафида Клаусура чемпионлигини қўлга киритди, бироқ атиги 2 ўйинда майдонга тушди холос. Чемпионликдан сўнг, уни «Сан Хосе» клуби ўз сафига қўшиб олди. Афсуски, у ерда омад кулиб боқмади. Қаҳрамонимиз тарихда фақат Гиннеснинг рекордлари китобидан ўрин эгаллагани учун қоладиганга ўхшамоқда. Гап шундаки, 24 ёшли футболчи 2018 йилдан бери клубсиз. Катта эҳтимол билан у профессионал футболга қайтмоқчи эмас. Шунга қарамай, қаҳрамонимизнинг футбол карьераси омадсиз кечди, деб бўлмайди. У қисқа фаолияти давомида футбол тарихида абадий қолишни уддалади.