Расман! “Манчестер Сити” сафига яна бир ҳужумчи қўшилди (Фото)

“Манчестер Сити” ҳужумчи Хулиан Альварес тез орада жамоа ихтиёрига етиб келишини маълум қилди.

Январ ойида ҳужумчи инглиз клуби билан 5,5 йиллик шартнома имзолади ва мавсум охиригача ижара асосида "Ривер Плейт" шарафини ҳимоя қилди.

Кеча, 7 июль куни Алварес Аргентина клуби сафида сўнгги ўйинни ўтказди. Унинг жамоаси Либертадорес кубоги 1/8 финалида “Велес Сарсфилд” билан нурсиз дуранг ўйнади ва умумий 0:1 ҳисобида мағлуб бўлиб (биринчи учрашув 0:1), турнирни тарк этди.

"Ман Сити" Хулиан дам олиш кунлари Манчестерга учиб келишини эълон қилди. Ҳужумчи инглиз клуби 19-рақам остида ўйнайди.

“Мен ниҳоятда бахтиёрман. "Ман Сити"да ўйнашга 100 фоиз тайёрман. Шубҳасиз, бу дунёдаги энг катта клублардан бири ҳисобланади. Жамоа қай даражада эканлигини тушуниш учун уларнинг сўнгги 10 йилдаги совринларига назар ташлаш кифоя.

Ишончим комилки, мен тезда клубга мослашиб кетаман. Гвардиоланинг ўйин услуби менга жуда ёқади ва мен унинг бир қисми бўлишимдан бахтиёрман. "Ман Сити" учун аргентиналик футболчилар бегона эмас ва мен ҳам клуб тарихида Серхио Агуэор, Пабло Забалета ва Карлос Тевес каби ўз номимни қолдиришга ҳаракат қиламан.

Мен “Ривер Плейт”дан жуда миннатдорман. Мухлисларга, мураббийлар штаби ва футболчиларга мени қўллаб-қувватлаганликлари учун раҳмат айтмоқчиман. Энди бор эътиборимни “Манчестер Сити”га қаратмоқчиман. Мен "шаҳарликлар"нинг муваффақиятига ҳисса қўшишни хоҳлайман", — деди Алварес.

Хулиан, Эрлинг Холанд, Кэлвин Филлипс ва Стефан Ортега билан биргаликда якшанба куни "Манчестер Сити" футболчиси сифатида расман таништирилади.